पोलादपूर | प्रतिनिधी | सारथी महाराष्ट्राचा न्यूज
पोलादपूर नगरपंचायत हद्दीतील विविध रस्त्यांवर पडलेल्या धोकादायक खड्ड्यांमुळे नागरिकांच्या सुरक्षिततेचा गंभीर प्रश्न निर्माण झाला असून, हे खड्डे तातडीने बुजविण्यात यावेत, अशी मागणी भाजप पोलादपूर शहराध्यक्ष महेश निकम यांनी नगरपंचायतीचे मुख्याधिकारी यांना निवेदनाद्वारे केली आहे.
सध्या सुरू असलेल्या पावसामुळे रस्त्यांवरील खड्ड्यांमध्ये पाणी साचत असल्याने वाहनचालकांना खड्ड्यांचा अंदाज येत नाही. परिणामी दुचाकी, चारचाकी वाहनचालक तसेच पादचाऱ्यांच्या अपघाताचा धोका मोठ्या प्रमाणात वाढला आहे. भविष्यात कोणतीही दुर्घटना घडण्यापूर्वी संबंधित खड्डे तातडीने बुजविण्यात यावेत किंवा आवश्यक त्या तात्पुरत्या उपाययोजना करून नागरिकांना सुरक्षित प्रवासाची सुविधा उपलब्ध करून द्यावी, अशी मागणी निवेदनात करण्यात आली आहे.
या निवेदनाची गंभीर दखल घेत नगरपंचायतीच्या मुख्याधिकाऱ्यांनी संबंधित विभागाला तात्काळ सूचना देऊन रस्त्यांवरील खड्डे शक्य तितक्या लवकर बुजविण्याची कार्यवाही करण्यात येईल, असे आश्वासन दिले.
यावेळी भाजप पोलादपूर शहर सरचिटणीस गणेश शेठ तसेच नगरसेविका सौ. अंकिता महेश निकम उपस्थित होत्या.
रस्त्यांची दुरुस्ती वेळेत झाल्यास नागरिकांना मोठा दिलासा मिळेल आणि संभाव्य अपघात टाळण्यास मदत होईल, असा विश्वास महेश निकम यांनी व्यक्त केला.
