दोंडाईचा | प्रतिनिधी | सारथी महाराष्ट्राचा न्यूज
आषाढी एकादशीनिमित्त दोंडाईचा व परिसरातील वारकरी भाविकांच्या सोयीसाठी दोंडाईचा आगारातून पंढरपूरसाठी विशेष एसटी बससेवा सुरू करण्यात आली आहे. या विशेष बसच्या पहिल्या फेरीत ४० प्रवाशांनी पंढरपूरकडे प्रस्थान केले.
या बससेवेच्या शुभारंभप्रसंगी लोकनेते सरकार साहेब रावल, नगरसेवक प्रविण महाजन, आगार व्यवस्थापक मिलिंद परदेशी यांच्यासह मान्यवर उपस्थित होते.
यावेळी सरकार साहेब रावल यांनी सांगितले की, आषाढी एकादशीनिमित्त लाखो भाविक विठ्ठलाच्या दर्शनासाठी पंढरपूरला जातात. अनेक वारकरी दिंड्यांमधून पायी वारी करतात, तर ज्येष्ठ नागरिक बससेवेचा लाभ घेतात. त्यांच्यासाठी ही विशेष बससेवा सवलतीच्या दरात उपलब्ध करून देण्यात आली आहे. ७५ वर्षांवरील वारकऱ्यांना संपूर्ण मोफत प्रवास, तर ज्येष्ठ नागरिक आणि महिलांना ५० टक्के सवलतीत प्रवास करता येणार असल्याची माहिती त्यांनी दिली. तसेच वारकऱ्यांनी प्रवासादरम्यान आरोग्याची विशेष काळजी घ्यावी, असे आवाहनही त्यांनी केले.
नगरसेवक प्रविण महाजन यांनी सांगितले की, मा. ना. जयकुमार भाऊ रावल यांच्या माध्यमातून दोंडाईचा आगारासाठी ‘जिजाऊ’ आणि वातानुकूलित विजेवर चालणाऱ्या ‘शिवाई’ बसेस उपलब्ध करून देण्यासाठी पाठपुरावा सुरू आहे. तसेच भविष्यात लांब पल्ल्याच्या बससेवा सुरू करण्याबरोबरच ग्रामीण विद्यार्थ्यांसाठी शटल बससेवा सुरू करण्याची मागणीही करण्यात आली आहे.
आगार व्यवस्थापक मिलिंद परदेशी यांनी सांगितले की, पंढरपूर यात्रेसाठी किमान ४० प्रवाशांचा गट तयार झाल्यास त्यांच्या गावापर्यंत बस पाठवून परतीच्या प्रवासातही त्यांना गावात सोडण्याची सुविधा उपलब्ध करून दिली जाईल.
कार्यक्रमाचे सूत्रसंचालन शिफ्ट प्रमुख नरेंद्र भाबड यांनी केले. कार्यक्रमाच्या यशस्वीतेसाठी योगेश शिंगाणे, सौ. सुवर्णा कळसकर, हंसराज ठाकरे, जगदीश पाटील, रणजित बागुल, नरेंद्र गिरासे, आसावरी भामरे, देविदास रोकडे, गिरी मॅडम, घनश्याम शर्मा, प्रविण उमप, तानाजी सोनटक्के आदींनी सहकार्य केले.
