माढा | प्रतिनिधी
माढा नगरपंचायत प्रशासनाने लेखी आश्वासन दिल्यानंतर १६ जुलै रोजी आयोजित करण्यात आलेले ‘हलगी नाद’ आंदोलन तात्पुरते स्थगित करण्यात आल्याची माहिती शहाजी उर्फ अभिजीत संजय साठे यांनी दिली.
माढा नगरपंचायतीने १५ जुलै २०२६ रोजी दिलेल्या लेखी पत्रानुसार, प्रभाग क्रमांक ५ मधील कुर्डूवाडी–बार्शी रस्ता ते माळे गल्ली या रस्त्याच्या कामात झालेल्या कथित अनियमिततेची प्रशासकीय चौकशी करून संबंधित कंत्राटदारावर नियमानुसार कारवाई करण्यात येईल, असे आश्वासन देण्यात आले आहे.
प्रशासनाच्या या लेखी आश्वासनाचा सन्मान राखत तसेच आवश्यक कार्यवाहीसाठी वेळ देण्याच्या उद्देशाने नियोजित आंदोलन स्थगित करण्याचा निर्णय घेण्यात आल्याचे शहाजी उर्फ अभिजीत संजय साठे यांनी स्पष्ट केले.
मात्र, प्रशासनाने दिलेल्या आश्वासनानुसार निश्चित कालावधीत योग्य ती कारवाई केली नाही, तर नागरिकांच्या न्याय हक्कासाठी अधिक तीव्र आणि लोकशाही मार्गाने आंदोलन छेडण्यात येईल, असा इशाराही त्यांनी दिला.
या जनहिताच्या लढ्यात साथ देणाऱ्या सर्व नागरिक, पत्रकार बंधू-भगिनी, सामाजिक कार्यकर्ते तसेच विविध राजकीय आणि सामाजिक संघटनांचे शहाजी उर्फ अभिजीत संजय साठे यांनी मनःपूर्वक आभार मानले.
