लोहारा | प्रतिनिधी :
लोहारा शहरातील जिजाऊ मेमोरियल प्रशासकीय सेवा महाविद्यालयात बुधवारी (१५ जुलै) भारतीय संस्कृत साहित्याचे महान सम्राट महाकवी कालिदास यांची जयंती उत्साहात साजरी करण्यात आली. त्यांच्या प्रतिमेचे पूजन करून कार्यक्रमाची सुरुवात करण्यात आली. पालक प्रतिनिधी सुधाकर चव्हाण आणि सतीश आरणकर यांच्या हस्ते प्रतिमापूजन करण्यात आले.
यावेळी उपप्राचार्य यशवंत चंदनशिवे यांनी महाकवी कालिदास यांच्या जीवनकार्याचा आणि साहित्याचा सविस्तर परिचय करून दिला. त्यांनी सांगितले की, जर्मनीचे महान विचारवंत गटे यांनी कालिदासांचे अभिज्ञानशाकुंतलम् वाचल्यानंतर त्यांच्या प्रतिभेचे मुक्तकंठाने कौतुक केले होते. कालिदास हे भारतीय संस्कृत साहित्याचे सर्वोच्च कवी असून त्यांच्या साहित्यामध्ये भारतीय संस्कृती, प्रेम, त्याग आणि जीवनमूल्यांचे उत्कृष्ट दर्शन घडते.
चंदनशिवे यांनी पुढे सांगितले की, रघुवंश आणि कुमारसंभव ही त्यांची महाकाव्ये, मेघदूत व ऋतुसंहार ही खंडकाव्ये तसेच अभिज्ञानशाकुंतलम्, विक्रमोर्वशीयम् आणि मालविकाग्निमित्रम् ही अजरामर नाटके आजही साहित्यविश्वात मानाचे स्थान राखून आहेत. युवा पिढीने कालिदासांचे साहित्य वाचून भारतीय संस्कृती, प्रेम आणि त्यागाची मूल्ये आत्मसात करावीत, असे आवाहन त्यांनी केले.
कार्यक्रमाचे सूत्रसंचालन प्रा. प्रियांका जमादार यांनी केले, तर आभार प्रदर्शन प्रा. रमेश गिराम यांनी केले.
यावेळी प्रा. प्राजक्ता लकडे, वैष्णवी लोहार, सौ. राणी माटे, सुयश चव्हाण, सिद्धार्थ सोनवते, विठ्ठल भोंडवे, कृष्णा पाटील, शीतल माटे तसेच महाविद्यालयातील विद्यार्थी मोठ्या संख्येने उपस्थित होते.
