जळकोट | प्रतिनिधी
जळकोट तालुक्यात लवकरच दिवाणी व फौजदारी न्यायालयाचे कामकाज सुरू होण्याचे संकेत मिळत असून, त्यादृष्टीने प्रशासकीय स्तरावर हालचालींना वेग आला आहे. न्यायालय सुरू करण्यासाठी प्रस्तावित ठिकाणाची पाहणी जिल्हा न्यायाधीश आणि जिल्हा प्रशासनाच्या अधिकाऱ्यांनी केली.
जळकोट येथील प्रशासकीय इमारतीत न्यायालयासाठी योग्य जागेची पाहणी करण्यात आली असून, न्यायालयाच्या कामकाजासाठी आवश्यक जागा निश्चित करण्यात आल्याची माहिती मिळाली आहे.
जळकोटला तालुक्याचा दर्जा मिळून तब्बल २७ वर्षे उलटूनही येथे तालुका स्तरावरील दिवाणी व फौजदारी न्यायालय मंजूर झाले नव्हते. त्यामुळे न्यायालयीन कामकाजासाठी तालुक्यातील नागरिकांना उदगीर आणि अहमदपूर येथे वारंवार जावे लागत होते.
जळकोट येथे कायमस्वरूपी न्यायालय सुरू करण्यासाठी जळकोट वकील महासंघ, तालुक्यातील वकील, विविध राजकीय पदाधिकारी आणि सामाजिक कार्यकर्त्यांनी सातत्याने पाठपुरावा केला होता. न्यायालयासाठी आवश्यक कर्मचारी संरचना (आकृतीबंध) मंजूर झाल्याने न्यायालय सुरू करण्याच्या प्रक्रियेला गती मिळाली आहे.
न्यायालय सुरू झाल्यानंतर जळकोट तालुक्यातील नागरिकांची न्यायालयीन कामांसाठी होणारी धावपळ कमी होणार असून, स्थानिक पातळीवरच न्यायसेवा उपलब्ध होणार असल्याने नागरिकांमध्ये समाधानाचे वातावरण आहे.
