📰 सारथी महाराष्ट्राचा न्यूज | मुलचेरा | प्रतिनिधी
चंद्रपूर जिल्ह्यातील सुमारे २२ लाख रुपयांच्या गॅस सिलिंडर चोरी प्रकरणाचा स्थानिक गुन्हे शाखेने पर्दाफाश करत मुलचेरा येथील गॅस एजन्सी व्यावसायिकासह तिघांना अटक केली आहे. या कारवाईमुळे मुलचेरा परिसरात मोठी खळबळ उडाली आहे.
पोलिसांनी दिलेल्या माहितीनुसार, पडोली पोलीस ठाण्याच्या हद्दीतून ३३२ घरगुती गॅस सिलिंडर, २० व्यावसायिक गॅस सिलिंडर तसेच अशोक लेलँड कंपनीचा ट्रक चोरीला गेला होता. या प्रकरणाचा तपास स्थानिक गुन्हे शाखेने वेगाने करत राजेंद्र रामचंद्र काकडे (वय ३२, रा. वांढोली फाटा, पडोली, चंद्रपूर), कुणाल सुभाष घुडे (वय २५, रा. महाडा कॉलनी, दाताळा, चंद्रपूर) आणि मोहित पोतदार (रा. मुलचेरा, जि. गडचिरोली) यांना अटक केली.
या कारवाईदरम्यान पोलिसांनी ५२ भरलेले घरगुती गॅस सिलिंडर, २५० रिकामे घरगुती सिलिंडर, २० भरलेले व्यावसायिक गॅस सिलिंडर तसेच चोरीच्या सिलिंडरच्या विक्रीतून मिळालेली २ लाख ४५ हजार रुपयांची रोख रक्कम असा मुद्देमाल जप्त केला आहे.
या कारवाईनंतर मुलचेरा परिसरात विविध चर्चांना उधाण आले असून, गॅस एजन्सीशी संबंधित व्यक्तीचे नाव एवढ्या मोठ्या चोरीप्रकरणात समोर आल्याने नागरिकांमध्ये आश्चर्य व्यक्त केले जात आहे. या प्रकरणाचा पुढील तपास चंद्रपूर पोलीस करत आहेत.
