तुळजापूर तालुका | प्रतिनिधी
तुळजापूर तालुक्यातील आणदूर येथील हॅलो मेडिकल फाउंडेशन अंतर्गत चालणाऱ्या नवोदय व्यसनमुक्ती केंद्रात उपचार घेत असलेल्या 29 वर्षीय तरुणाने शौचालयात गळफास घेऊन आत्महत्या केल्याची घटना 13 जुलै रोजी पहाटेच्या सुमारास घडली. या घटनेमुळे परिसरात खळबळ उडाली असून पोलिसांनी आकस्मिक मृत्यूची नोंद केली आहे.
मृत तरुणाचे नाव सूरज भीमराव भांडकुंबे (वय 29, रा. मजरेवाडी, सोलापूर) असे आहे. ते सुमारे दहा दिवसांपूर्वी व्यसनमुक्ती उपचारासाठी या केंद्रात दाखल झाले होते.
प्राथमिक माहितीनुसार, सूरज यांनी शौचालयातील पाण्याच्या पाइपला टॉवेल बांधून गळफास घेतला. पहाटेच्या सुमारास त्यांचा मृतदेह आढळून आल्यानंतर केंद्र प्रशासनाने पोलिसांना माहिती दिली.
घटनेमागील नेमके कारण अद्याप स्पष्ट झाले नसून, पोलिसांकडून सर्व बाजूंनी तपास सुरू आहे. तपास पूर्ण झाल्यानंतरच घटनेचे कारण स्पष्ट होणार असल्याचे पोलिसांनी सांगितले.
दरम्यान, या घटनेनंतर भविष्यात अशा प्रकारच्या घटना घडू नयेत यासाठी आवश्यक ती काळजी घेतली जाईल, अशी माहिती केंद्राचे प्रतिनिधी बसवराज नरे यांनी दिली.
