करमाळा | प्रतिनिधी :
करमाळा तालुक्याच्या तहसीलदार शिल्पा ठोकडे यांनी पदभार स्वीकारल्यानंतर महसूल प्रशासन अधिक लोकाभिमुख करण्यावर भर दिला आहे. नागरिकांच्या तक्रारींचे वेळेत निवारण, शेतकऱ्यांच्या प्रश्नांना प्राधान्य आणि शासकीय सेवांमध्ये पारदर्शकता आणण्यासाठी विविध उपाययोजना राबविल्या जात असल्याची माहिती त्यांनी दिली.
महसूल विभागाशी संबंधित प्रकरणे, विविध दाखले, जमिनीच्या नोंदी तसेच शासनाच्या योजनांचा लाभ सर्वसामान्य नागरिकांपर्यंत वेळेत पोहोचविणे हे प्रशासनाचे प्रमुख उद्दिष्ट असल्याचे त्यांनी स्पष्ट केले.
तक्रार घेऊन येणाऱ्या प्रत्येक नागरिकाचे म्हणणे शांतपणे ऐकून त्यावर कायदेशीर चौकटीत तत्काळ कार्यवाही करण्यावर भर दिला जात आहे. तसेच शेतकऱ्यांच्या जमिनीचे वाद, नैसर्गिक आपत्तीनंतरची मदत आणि महसुलाशी संबंधित प्रकरणांचा जलद निपटारा करण्यासाठी विशेष प्रयत्न सुरू असल्याचेही त्यांनी सांगितले.
कार्यालयीन कामकाज अधिक सुसूत्र व पारदर्शक व्हावे, नागरिकांना अनावश्यक हेलपाटे मारावे लागू नयेत आणि प्रत्येकाला सन्मानाची वागणूक मिळावी, यासाठी प्रशासन कटिबद्ध असल्याचे तहसीलदार शिल्पा ठोकडे यांनी नमूद केले.
“तालुक्यातील प्रत्येक नागरिकाला, विशेषतः ग्रामीण भागातील गरीब आणि गरजू लोकांना वेळेत न्याय मिळवून देणे हे माझे मुख्य कर्तव्य आहे. प्रशासकीय स्तरावर सर्वसामान्यांच्या कामांना गती देऊन त्यांच्या अडचणी प्राधान्याने सोडवल्या जातील.”
— शिल्पा ठोकडे, तहसीलदार, करमाळा
तहसीलदारांच्या या कार्यपद्धतीमुळे महसूल प्रशासनाविषयी नागरिकांमध्ये सकारात्मक भावना निर्माण होत असून, सर्वसामान्यांच्या प्रश्नांना प्राधान्य देणारा कारभार राबविला जात असल्याचे मत नागरिकांकडून व्यक्त केले जात आहे.
