चाकण | प्रतिनिधी :
भारतीय जनता पार्टीच्या आंबेगाव पूर्व व चाकण मंडळाची संयुक्त संघटनात्मक आढावा बैठक चाकण येथे उत्साहात पार पडली. बैठकीत नवीन मंडळ कार्यकारिणीची घोषणा, पदवीधर मतदार नोंदणी अभियान, रक्तदान शिबिराचे नियोजन, शेतकरी कर्जमाफीचा आढावा तसेच आगामी निवडणुकांच्या तयारीसह विविध संघटनात्मक विषयांवर चर्चा करण्यात आली.
ही बैठक भाजप महाराष्ट्र प्रदेशाध्यक्ष आमदार रविंद्र (दादा) चव्हाण यांच्या मार्गदर्शनाखाली आणि पुणे उत्तर मावळ जिल्हाध्यक्ष प्रदीप दादा कंद यांच्या प्रमुख उपस्थितीत झाली.
कार्यक्रमाच्या प्रारंभी आंबेगाव पूर्व मंडळाचे अध्यक्ष किरण बाबाजी वाळुंज यांनी मंडळाच्या कामाचा आढावा सादर केला. त्यानंतर पुणे उत्तर मावळचे महामंत्री डॉ. ताराचंद कराळे यांनी संघटनात्मक विषयांवर मार्गदर्शन केले. जिल्हाध्यक्ष प्रदीप दादा कंद यांनी प्रत्येक बूथ सक्षम करून पक्षाची विचारधारा जनतेपर्यंत पोहोचविण्याचे आणि आगामी निवडणुकांसाठी कार्यकर्त्यांनी सज्ज राहण्याचे आवाहन केले.
बैठकीत राहुल गव्हाणे यांनी पदवीधर मतदार नोंदणी अभियानाची माहिती देत पात्र मतदारांची नोंदणी पूर्ण करण्यासाठी घराघरात जनजागृती करण्याचे आवाहन केले.
यावेळी मुख्यमंत्री देवेंद्र फडणवीस यांच्या वाढदिवसानिमित्त आयोजित करण्यात येणाऱ्या रक्तदान शिबिराचे नियोजन करण्यात आले. तसेच शेतकरी कर्जमाफी, शासनाच्या विविध योजनांचा लाभ पात्र लाभार्थ्यांपर्यंत पोहोचविणे आणि जनहिताच्या प्रश्नांबाबतही चर्चा झाली.
बैठकीत आंबेगाव पूर्व मंडळाची नवीन कार्यकारिणी जाहीर करण्यात आली. यामुळे कार्यकर्त्यांमध्ये उत्साहाचे वातावरण निर्माण झाले असून संघटन विस्तार, बूथ सक्षमीकरण आणि जनसंपर्क अधिक प्रभावीपणे राबविण्याचा निर्धार व्यक्त करण्यात आला.
बैठकीचे सूत्रसंचालन हर्षल सुतार यांनी केले.
यावेळी डॉ. ताराचंद कराळे, प्रियाताई पवार, प्रमोद बाणखेले, श्रीराम बांगर, संदीप भोंडवे, अविनाश बबरे, संदीप बाणखेले, मयूर भोर, श्रीकृष्ण देशमुख, जयसिंगराव एरंडे, अरविंद बबरे, मेजर निलेश जाधव, संजय रोंधळ, सोपन वायकर, मोहन सावंत यांच्यासह आंबेगाव पूर्व व चाकण मंडळातील पदाधिकारी, कार्यकर्ते आणि भाजपाचे ज्येष्ठ नेते मोठ्या संख्येने उपस्थित होते.
बैठकीच्या शेवटी पदवीधर मतदार नोंदणी अभियान, रक्तदान शिबिर, संघटन बळकटीकरण आणि जनहिताच्या विविध उपक्रमांमध्ये सक्रिय सहभाग नोंदविण्याचा संकल्प उपस्थितांनी व्यक्त केला.
