माहूर | प्रतिनिधी
माहूर शहरातील प्रधानमंत्री आवास योजनेच्या लाभार्थ्यांचे अनेक वर्षांपासून प्रलंबित असलेले घरकुल अनुदान तातडीने वितरित करावे, अन्यथा ५ ऑगस्ट २०२६ रोजी दुपारी १२ वाजल्यापासून लाभार्थ्यांसह बेमुदत आमरण उपोषण करण्यात येईल, असा इशारा काँग्रेसचे माहूर तालुकाध्यक्ष आनंद गंगाधरराव पाटील तुपदाळे यांनी दिला आहे.
यासंदर्भात त्यांनी नगर पंचायत माहूरच्या मुख्याधिकाऱ्यांना निवेदन सादर केले असून, त्यामध्ये सन २०१८ ते २०२५ या कालावधीत विविध डीपीआरअंतर्गत मंजूर झालेल्या प्रधानमंत्री आवास योजनेच्या लाभार्थ्यांचे शासकीय अनुदान अद्यापही वितरित झाले नसल्याचा आरोप करण्यात आला आहे.
निवेदनानुसार, यापूर्वीही या मागणीसाठी आमरण उपोषण करण्यात आले होते. त्यावेळी नगर पंचायत प्रशासनाने संबंधित विभागाकडे निधीची मागणी करून लाभार्थ्यांच्या खात्यात अनुदान जमा करण्याचे लेखी आश्वासन दिले होते. तसेच महाराष्ट्र गृहनिर्माण व क्षेत्र विकास प्राधिकरणाकडून (MHADA) आवश्यक निधीची मागणी केल्यास तो तातडीने उपलब्ध करून दिला जाईल, असेही सांगण्यात आले होते.
नगर पंचायतमार्फत सुमारे ३ कोटी ६७ लाख रुपयांच्या निधीची मागणी करण्यात आल्याचे सांगण्यात आले असले, तरी आजपर्यंत एकाही पात्र लाभार्थ्याच्या खात्यात अनुदान जमा झाले नसल्याचा दावा निवेदनात करण्यात आला आहे.
प्रशासनाने तातडीने कार्यवाही करून सर्व पात्र लाभार्थ्यांना त्यांचे प्रलंबित अनुदान वितरित करावे, अन्यथा ५ ऑगस्ट २०२६ पासून लाभार्थ्यांसह बेमुदत आमरण उपोषण करण्यात येईल, असा स्पष्ट इशारा आनंद पाटील तुपदाळे यांनी दिला आहे.
या निवेदनाच्या प्रती तहसीलदार तथा पोलिस निरीक्षक, माहूर यांनाही माहितीस्तव देण्यात आल्या आहेत.
