अलिबाग | प्रतिनिधी :
रायगड जिल्हा परिषदेचे माजी सभापती तथा विद्यमान सदस्य दिलीप भोईर (छोटम शेठ) यांनी वाढदिवसानिमित्त सामाजिक बांधिलकी जपत एक आगळावेगळा आदर्श निर्माण केला आहे. वाढदिवसानिमित्त पुष्पगुच्छ किंवा भेटवस्तूंऐवजी वह्या व शैक्षणिक साहित्य भेट द्या, असे आवाहन त्यांनी केले होते. या आवाहनाला नागरिकांनी उत्स्फूर्त प्रतिसाद देत तब्बल ३५ हजार वह्या आणि मोठ्या प्रमाणात शैक्षणिक साहित्य भेट दिले.
जमा झालेले साहित्य स्वतःकडे न ठेवता दिलीप भोईर यांनी अलिबाग तालुक्यातील २२० हून अधिक जिल्हा परिषद शाळांमधील विद्यार्थ्यांना वाटप करण्याचा उपक्रम राबविला. या उपक्रमामुळे अनेक गरजू विद्यार्थ्यांना शैक्षणिक साहित्याचा लाभ मिळाला.
साई क्रीडा मंडळाच्या पुढाकारातून तसेच सागर पाटील, विघ्नेश पाटील आणि नवीन पाटील यांच्या सहकार्याने भाकरवड येथील जिल्हा परिषद शाळेतील विद्यार्थ्यांनाही वह्या व शैक्षणिक साहित्याचे वितरण करण्यात आले.
या कार्यक्रमाला दिलीप भोईर (छोटम शेठ), नयन पाटील, राजेश पाटील, विशाल पाटील, शाळेतील शिक्षकवृंद तसेच विद्यार्थी मोठ्या संख्येने उपस्थित होते.
या उपक्रमामुळे वाढदिवस सामाजिक उपयुक्ततेने साजरा करण्याचा प्रेरणादायी संदेश समाजात पोहोचला असून, विद्यार्थी आणि पालकांकडून या उपक्रमाचे कौतुक होत आहे.
