📰 सारथी महाराष्ट्राचा न्यूज | लातूर | प्रतिनिधी
दुग्ध उत्पादन वाढीसाठी आधुनिक तंत्रज्ञानाचा प्रभावी वापर करणे आवश्यक असून, त्यासाठी पशुपालकांपर्यंत नवतंत्रज्ञान पोहोचविणारे विस्तार शिक्षण व प्रशिक्षण कार्यक्रम मोठ्या प्रमाणावर राबविण्याची गरज असल्याचे प्रतिपादन जिल्हाधिकारी डॉ. भारत बास्टेवाड यांनी केले.
लातूर येथे आयोजित “पशुवैद्यकीय सेवा, तंत्रज्ञान, वैज्ञानिक प्रगती आणि पशुधन आरोग्य” या विषयावरील पशुवैद्यकांसाठीच्या विभागीय तांत्रिक चर्चासत्राच्या उद्घाटनप्रसंगी ते बोलत होते.
यावेळी प्रादेशिक पशुसंवर्धन सहआयुक्त डॉ. नवासाहेब सोनवणे, डॉ. चंद्रशेखर बिडवई, डॉ. बाबासाहेब ढोबरे, प्रा. डॉ. अनिल भिकाणे, डॉ. उमेश कुंभार, डॉ. राजकुमार पडिले, डॉ. संखाराम खुणे, डॉ. आर. डी. कदम, डॉ. अरविंद देशपांडे तसेच सचिव डॉ. रविंद्र डावरे उपस्थित होते.
प्रा. डॉ. अनिल भिकाणे यांनी आपल्या व्याख्यानात प्रतिजैविक प्रतिरोधकता (Antimicrobial Resistance) ही पशुवैद्यकीय आणि मानवी आरोग्यासमोरील अत्यंत गंभीर समस्या असल्याचे सांगितले. पशुधनाच्या आरोग्य व्यवस्थापनात वैज्ञानिक दृष्टीकोन स्वीकारण्याची तसेच औषधांचा जबाबदारीने वापर करण्याची गरज त्यांनी अधोरेखित केली.
कार्यक्रमाचे सूत्रसंचालन सहायक आयुक्त डॉ. त्र्यंबक शिंदे यांनी केले, तर कुणाल घुगार्डे यांनी उपस्थितांचे आभार मानले.
