📰 सारथी महाराष्ट्राचा न्यूज | अमरावती | प्रतिनिधी
महाराष्ट्र राज्य मार्ग परिवहन महामंडळाने (MSRTC) दि. 12 जुलै 2026 पासून दर रविवारी अमरावती–चिखलदरा दर्शन विशेष बस सेवा सुरू केली आहे. या उपक्रमाला पर्यटकांकडून चांगला प्रतिसाद मिळत असला तरी, वाढत्या प्रवासी संख्येच्या पार्श्वभूमीवर अमरावती–चिखलदरा दरम्यान नियमित बससेवा सुरू करण्याची मागणी स्थानिक नागरिक आणि चिखलदरा परिसरातील रहिवाशांकडून करण्यात येत आहे.
सदर विशेष बस अमरावती मुख्य बसस्थानकावरून सकाळी 8 वाजता सुटते आणि चिखलदरा येथून सायंकाळी 5 वाजता परतीचा प्रवास करते. या विशेष सेवेमध्ये चिखलदऱ्यातील प्रमुख पर्यटनस्थळांचा समावेश करण्यात आला आहे.
मात्र, आठवड्यातील इतर दिवशी नियमित एसटी सेवा उपलब्ध नसल्यामुळे पर्यटकांना खासगी वाहनांवर अवलंबून राहावे लागत आहे. त्यामुळे प्रवास खर्च वाढत असून अनेक पर्यटकांना गैरसोयीचा सामना करावा लागत आहे.
पर्यटनाला चालना मिळावी, पर्यटकांना सुरक्षित व परवडणारी वाहतूक उपलब्ध व्हावी तसेच स्थानिक नागरिकांच्या रोजगारालाही प्रोत्साहन मिळावे, यासाठी अमरावती–चिखलदरा मार्गावर किमान दोन इलेक्ट्रिक बस नियमित सुरू कराव्यात, अशी मागणी हनी व्हिलेज परिसरातील रहिवासी तसेच स्थानिक नागरिकांनी जिल्हा प्रशासन आणि महाराष्ट्र राज्य मार्ग परिवहन महामंडळाकडे केली आहे.
