वारकऱ्यांच्या सेवेतून विद्यार्थ्यांमध्ये रुजला भक्तिभाव व सेवाभाव

📰 सारथी महाराष्ट्राचा न्यूज | वाखारी | प्रतिनिधी

आषाढी वारीनिमित्त रँचो गुरुकुल इंग्लिश मीडियम सीबीएसई स्कूल, वाखारी यांच्या वतीने ‘बाल भक्ती वारकरी सेवा’ हा अभिनव आणि संस्कारक्षम उपक्रम उत्साहात राबविण्यात आला. सोमवारी (दि. 13 जुलै 2026) पुणे–सोलापूर महामार्गावरील सह्याद्री हॉटेलसमोर आयोजित या उपक्रमात इयत्ता पाचवी ते नववीच्या विद्यार्थ्यांनी वारकऱ्यांची मनोभावे सेवा करत समाजापुढे आदर्श निर्माण केला.

या उपक्रमात विद्यार्थ्यांनी वारकऱ्यांचे हात-पाय प्रेमपूर्वक चेपून त्यांचा प्रवासाचा थकवा दूर करण्याचा प्रयत्न केला. विद्यार्थ्यांच्या या निस्वार्थ सेवेमुळे वारकऱ्यांच्या चेहऱ्यावर समाधान आणि आनंदाचे भाव उमटले.

या उपक्रमाचा मुख्य उद्देश विद्यार्थ्यांमध्ये सेवाभाव, भक्तिभाव, करुणा, नम्रता आणि मानवतेचे संस्कार रुजविणे हा होता. विठ्ठलाचे दर्शन घेण्यासाठी केवळ पंढरपूरला जाणे आवश्यक नसून प्रत्येक वारकऱ्यामध्ये विठ्ठलाचे रूप पाहून त्यांची सेवा करणे म्हणजेच साक्षात विठ्ठलाची सेवा, हा संदेश विद्यार्थ्यांपर्यंत पोहोचविण्यात आला.

लहान वयातच विद्यार्थ्यांना समाजसेवा, संवेदनशीलता, सहकार्याची भावना आणि भारतीय संस्कृतीबद्दल आदर निर्माण व्हावा, या उद्देशाने आयोजित करण्यात आलेला हा उपक्रम मूल्यशिक्षणाची प्रभावी शिकवण देणारा ठरला.

या सेवाकार्यात शाळेचे विद्यार्थी, शिक्षक आणि कर्मचारी यांनी उत्स्फूर्त सहभाग घेतला. शाळेच्या डायरेक्टर श्रीमती ज्योती देशमुख तसेच मुख्याध्यापिका सौ. मोहिनी गायकवाड यांच्या मार्गदर्शनाखाली हा उपक्रम यशस्वीरीत्या पार पडला. उपस्थित वारकऱ्यांनी विद्यार्थ्यांच्या सेवाभावी वृत्तीचे कौतुक करत शाळेच्या या उपक्रमाचे मनापासून अभिनंदन केले.