📰 सारथी महाराष्ट्राचा न्यूज | बार्शी | प्रतिनिधी :
बार्शी येथील अन्सार रफिक पठाण आणि अस्लम लतिफ शेख यांनी स्थापन केलेल्या ‘अल हरिणी फाऊंडेशन’ या संस्थेच्या कथित पाकिस्तान कनेक्शनप्रकरणी दहशतवादविरोधी पथक (ATS) तपास करत असून, या प्रकरणात मोडनिंब येथील संस्थेचे उपाध्यक्ष आरिफ बागवान यालाही अटक करण्यात आली आहे.
तपासादरम्यान आरिफ बागवान याने देणगीच्या स्वरूपात सुमारे 10.50 कोटी रुपये जमा केल्याची माहिती समोर आली आहे. तसेच त्याच्या मोबाईलमध्ये पाकिस्तानातील सुमारे 50 व्यक्तींचे मोबाईल क्रमांक आढळल्याचा दावा तपास यंत्रणांकडून करण्यात आला आहे. याशिवाय तो पाकिस्तानातील कथित गँगस्टर शहजाद भट्टी याच्याशी संबंधित काही व्हॉट्सअॅप गटांमध्ये सहभागी असल्याचेही तपासात समोर आल्याचे सांगण्यात येत आहे.
तपासादरम्यान आरिफ बागवान काही दिवस नेपाळमध्ये गेला होता. तो तेथे कोणाला भेटला आणि त्याच्या दौऱ्याचा उद्देश काय होता, याचा तपास ATS करत आहे.
दरम्यान, या प्रकरणातील अन्सार पठाण आणि आरिफ बागवान यांचे जामीन अर्ज सोलापूर जिल्हा व सत्र न्यायालयाने फेटाळले आहेत. तसेच फरार आरोपी अस्लम लतिफ शेख याचा अटकपूर्व जामीन अर्जही न्यायालयाने नामंजूर केला आहे.
या प्रकरणाचा पुढील तपास दहशतवादविरोधी पथक (ATS) करत असून, तपासानंतरच अधिकृत माहिती स्पष्ट होणार आहे.
