विभागीय प्रतिनिधी :
श्री सुरेशदादा जैन फार्मसी महाविद्यालयातील चतुर्थ वर्ष बी. फार्मसीच्या विद्यार्थ्यांनी प्रॅक्टिस स्कूल (BP-706PS) अभ्यासक्रमांतर्गत जळगाव येथील जिल्हा शासकीय वैद्यकीय रुग्णालयाला शैक्षणिक भेट दिली. या भेटीद्वारे विद्यार्थ्यांना औषधनिर्माण आणि आरोग्यसेवा क्षेत्रातील प्रत्यक्ष कार्यपद्धतीची सखोल माहिती मिळाली.
भेटीदरम्यान विद्यार्थ्यांनी रुग्णालयातील औषध वितरण व्यवस्था, औषध साठवणूक प्रक्रिया, रुग्णसेवा तसेच विविध आरोग्य विभागांच्या कार्यपद्धतीचे बारकाईने निरीक्षण केले. तसेच, रुग्णालयात वापरण्यात येणाऱ्या ई-औषधी (e-Aushadhi) प्रणालीचे प्रात्यक्षिक पाहून औषधांच्या साठा व्यवस्थापन, आवक-जावक आणि वितरण प्रक्रियेची माहिती घेतली.
यावेळी वरिष्ठ फार्मासिस्ट श्री. प्रमोद पाटील यांनी विद्यार्थ्यांना बी. फार्मसीनंतर शासकीय क्षेत्रातील विविध करिअर संधी, स्पर्धा परीक्षा, शासकीय सेवेमधील जबाबदाऱ्या आणि व्यावसायिक संधींबाबत मार्गदर्शन केले. विद्यार्थ्यांच्या विविध प्रश्नांची त्यांनी समाधानकारक उत्तरे दिली.
या शैक्षणिक भेटीमुळे विद्यार्थ्यांना वर्गात मिळालेल्या सैद्धांतिक ज्ञानाची प्रत्यक्ष कार्यपद्धतीशी सांगड घालण्याची संधी मिळाली. त्यामुळे त्यांचा व्यावसायिक दृष्टिकोन अधिक व्यापक झाला असून ही भेट विद्यार्थ्यांसाठी ज्ञानवर्धक, अनुभवसमृद्ध आणि प्रेरणादायी ठरली.
या शैक्षणिक भेटीचे समन्वयन प्रा. सुनील तडवी यांनी केले. उपसमन्वयक म्हणून प्रा. योगेश बागड आणि प्रा. चारुलता सूर्यवंशी यांनी सहकार्य केले. महाविद्यालयाच्या या उपक्रमाचे विद्यार्थी, शिक्षक तसेच आरोग्य विभागाकडून कौतुक करण्यात आले.
