📰 सारथी महाराष्ट्राचा न्यूज | उरण | प्रतिनिधी :
उरण तालुक्यातील नवीन शेवा येथे एका घराचा स्लॅब अचानक कोसळून एकाच कुटुंबातील तिघेजण जखमी झाल्याची घटना घडली. या घटनेनंतर परिसरात भीतीचे वातावरण निर्माण झाले असून, प्रलंबित पुनर्वसन प्रक्रियेबाबत ग्रामस्थांनी तीव्र नाराजी व्यक्त केली आहे.
ग्रामस्थांच्या माहितीनुसार, जेएनपीटी (JNPT) प्रकल्पासाठी अनेक वर्षांपूर्वी स्थानिकांनी आपल्या जमिनी शासनाला दिल्या. मात्र, सुमारे चार दशकांनंतरही पुनर्वसनाचा प्रश्न पूर्णतः मार्गी लागलेला नसल्याचा आरोप करण्यात आला आहे. तात्पुरत्या स्वरूपात उपलब्ध करून दिलेल्या जागांवर अनेक कुटुंबे आजही जीर्ण आणि धोकादायक घरांमध्ये वास्तव्यास असल्याचे ग्रामस्थांचे म्हणणे आहे.
पुनर्वसनाची जमीन अद्याप संबंधितांच्या नावावर न झाल्याने सातबारा उताऱ्यावर हक्क मिळालेला नाही. त्यामुळे घरांच्या दुरुस्तीसाठी अथवा नवीन घर बांधण्यासाठी बँकांकडून कर्ज मिळत नसल्याची व्यथा ग्रामस्थांनी मांडली आहे. वारंवार निवेदने देऊनही प्रशासनाकडून प्रभावी कार्यवाही झाली नसल्याचा आरोपही त्यांनी केला आहे.
ग्रामस्थांच्या मते, पुनर्वसनाची प्रक्रिया वेळेत पूर्ण झाली असती किंवा जमिनींची मालकी संबंधितांच्या नावावर झाली असती, तर सुरक्षित घर उभारणे शक्य झाले असते आणि ही दुर्घटना टाळता आली असती. तथापि, या दाव्यांबाबत प्रशासनाची अधिकृत भूमिका अद्याप समोर आलेली नाही.
दरम्यान, जखमींना तातडीने आर्थिक मदत, मोफत व दर्जेदार वैद्यकीय उपचार, तसेच संपूर्ण घटनेची निष्पक्ष चौकशी करण्याची मागणी ग्रामस्थांनी केली आहे. पुनर्वसन, सातबारा हक्क आणि सुरक्षित निवासाचा प्रश्न तातडीने सोडवावा, अशी मागणीही करण्यात आली आहे.
घटनेचा तपशील :
१६ जुलै २०२६ रोजी पहाटे सुमारे ६ वाजण्याच्या सुमारास घराचा स्लॅब कोसळला. त्या वेळी घरात झोपलेल्या ८ ते १० वर्षांच्या मुलासह त्याचे आई-वडील ढिगाऱ्याखाली अडकले. शेजारील ग्रामस्थांनी तातडीने मदतकार्य सुरू करून मुलाला बाहेर काढले. त्यानंतर अग्निशमन दलाने घटनास्थळी पोहोचून आई-वडिलांची सुटका केली. तिघांवर सध्या कामोठे येथील एमजीएम रुग्णालयात उपचार सुरू आहेत.
या घटनेनंतर नवीन शेवा परिसरात संतापाची लाट उसळली असून, पुनर्वसनाचा प्रश्न तातडीने निकाली न काढल्यास लोकशाही मार्गाने तीव्र आंदोलन छेडण्याचा इशारा ग्रामस्थांनी दिला आहे.
