पत्रकार प्रतिनिधी :
वाई पंचायत समितीच्या पशुसंवर्धन विभागाचे अधिकारी वारंवार कार्यालयात अनुपस्थित राहत असल्याचा आरोप करत पीपल्स रिपब्लिकन पार्टीने गटविकास अधिकाऱ्यांकडे निवेदन देत चौकशीची मागणी केली आहे. याबाबत तातडीने खुलासा न झाल्यास आंदोलन छेडण्याचा इशाराही पक्षाने दिला आहे.
पीपल्स रिपब्लिकन पार्टीचे वाई तालुका अध्यक्ष विजय सातपुते यांनी सांगितले की, गेल्या अनेक दिवसांपासून पशुसंवर्धन अधिकारी देशपांडे यांची भेट घेण्यासाठी कार्यालयात वारंवार जावे लागत आहे. मात्र, ते कार्यालयात उपलब्ध नसल्याचे आढळून येते. तसेच संपर्कासाठी दिलेला दूरध्वनी क्रमांकही लागत नसल्याचा आरोप त्यांनी केला.
कार्यालयातील कर्मचाऱ्यांकडे चौकशी केली असता अधिकाऱ्यांच्या उपस्थितीबाबत कोणतीही ठोस माहिती मिळत नसल्याचा दावा करण्यात आला आहे. तसेच कार्यालयात हालचाल नोंदवही (मुव्हमेंट रजिस्टर) उपलब्ध नसल्याचा आरोपही निवेदनात करण्यात आला आहे.
गटविकास अधिकाऱ्यांनी या प्रकरणाची सखोल चौकशी करून संबंधित अधिकाऱ्यांच्या उपस्थितीची नोंद तपासावी आणि आवश्यक ती कारवाई करावी, अशी मागणी करण्यात आली आहे.
याबाबत तातडीने खुलासा न झाल्यास पीपल्स रिपब्लिकन पार्टीचे राष्ट्रीय अध्यक्ष प्रा. जोगेंद्र कवाडे, राष्ट्रीय कार्याध्यक्ष तथा महाराष्ट्र लघु उद्योग विकास महामंडळाचे उपाध्यक्ष (राज्यमंत्री दर्जा) भाई जयदीप कवाडे यांच्या मार्गदर्शनाखाली जिल्हाध्यक्ष युवराज कांबळे, जिल्हा युवक अध्यक्ष अनमोल कांबळे यांच्या उपस्थितीत वेगळ्या स्वरूपाचे आंदोलन करण्यात येईल, असा इशारा विजय सातपुते यांनी दिला.
यावेळी पक्षाचे सातारा जिल्हा महासचिव प्रणित मोरे, वाई शहराध्यक्ष रणवीर परदेशी, तेजस कांबळे, युवक तालुकाध्यक्ष आकाश गायकवाड, जिल्हा संघटक विकास जाधव तसेच पक्षाचे कार्यकर्ते उपस्थित होते.
