मोहन बारहाते तालुकाध्यक्ष; कचरूलाल बारहाते यांची जिल्हा कार्यकारिणी सदस्यपदी नियुक्ती
परभणी | प्रतिनिधी :
मानवत तालुक्यातील पत्रकारांची संघटना व्हॉइस ऑफ मीडियाच्या तालुका कार्यकारिणीची निवड बुधवारी (दि. १५ जुलै २०२६) उत्साहपूर्ण वातावरणात बिनविरोध पार पडली. या निवडीत ज्येष्ठ पत्रकार मोहन बारहाते यांची तालुकाध्यक्षपदी बिनविरोध निवड करण्यात आली. नव्या कार्यकारिणीच्या निवडीमुळे तालुक्यातील पत्रकारांमध्ये उत्साहाचे वातावरण निर्माण झाले आहे.
नवीन कार्यकारिणीत गोविंद गहिलोत यांची उपाध्यक्ष, भैयासाहेब गायकवाड यांची कार्याध्यक्ष, अलीम खान पठाण यांची सचिव, रमेश मुलगीर यांची सहसचिव, इरफान बागवान यांची संघटक तर किशन बारहाते यांची कार्यवाह म्हणून बिनविरोध निवड करण्यात आली.
कार्यकारिणी सदस्य म्हणून सत्यशील धबडगे, कपिल शिंदे, हाफिज बागवान, मुस्तखिम बेलदार, राजू पठाडे, रमेश यादव, वसंत मांडे, रियाज शेख, विलास बारहाते, रिजवान बागवान, विजय यादव आणि रामकिशन कदम यांची निवड करण्यात आली.
यावेळी मावळते तालुकाध्यक्ष कचरूलाल बारहाते यांनी संघटनेच्या बळकटीसाठी केलेल्या कार्याचा गौरव करण्यात आला. त्यांच्या कार्याची दखल घेत त्यांची व्हॉइस ऑफ मीडिया जिल्हा कार्यकारिणी सदस्य म्हणून नियुक्ती करण्यात आली. उपस्थितांनी त्यांचा सत्कार करून पुढील वाटचालीस शुभेच्छा दिल्या.
या निवड प्रक्रियेस व्हॉइस ऑफ मीडियाचे जिल्हाध्यक्ष कैलास चव्हाण, विजय कुलकर्णी, बाळासाहेब काळे यांच्यासह जिल्ह्यातील पदाधिकारी, पत्रकार आणि सदस्य मोठ्या संख्येने उपस्थित होते. यावेळी मान्यवरांनी नवनिर्वाचित पदाधिकाऱ्यांचे अभिनंदन करत पत्रकारांच्या प्रश्नांवर एकजुटीने काम करण्याचे आवाहन केले.
नवनिर्वाचित तालुकाध्यक्ष मोहन बारहाते यांनी संघटनेने दाखविलेल्या विश्वासाबद्दल सर्वांचे आभार मानले. मानवत तालुक्यातील पत्रकारांचे प्रश्न प्राधान्याने सोडविणे, पत्रकारांच्या हक्कांसाठी सातत्याने लढा देणे, त्यांचे हित जपणे तसेच व्हॉइस ऑफ मीडियाची संघटनात्मक बांधणी अधिक मजबूत करण्यासाठी सर्व पदाधिकारी व सदस्यांना सोबत घेऊन कार्य करण्याची ग्वाही त्यांनी दिली.
नव्या कार्यकारिणीच्या स्थापनेमुळे मानवत तालुक्यातील पत्रकार संघटनेला अधिक बळ मिळणार असून पत्रकारांच्या विविध प्रश्नांवर प्रभावीपणे आवाज उठविण्यासाठी ही कार्यकारिणी सकारात्मक भूमिका बजावेल, असा विश्वास उपस्थितांनी व्यक्त केला.
