किनवट | प्रतिनिधी
राज्यात गुटखा, पानमसाला आणि सुगंधी सुपारीच्या विक्रीवर बंदी असतानाही काही विक्रेत्यांनी नियमांना बगल देण्यासाठी नवीन मार्ग अवलंबल्याची चर्चा किनवट परिसरात सुरू आहे. शहरातील काही पानटपऱ्या वरकरणी बंद दिसत असल्या, तरी गुप्तपणे गुटखा विक्री सुरू असल्याचा आरोप स्थानिकांकडून केला जात आहे.
मिळालेल्या माहितीनुसार, काही विक्रेते तयार गुटखा पॅकेट्स किंवा साहित्य कपड्यांच्या खिशात ठेवून गर्दीच्या चौकांमध्ये, बाजारपेठेत व इतर वर्दळीच्या ठिकाणी फिरत ग्राहकांना विक्री करत असल्याचे सांगितले जात आहे. या पद्धतीला स्थानिकांमध्ये “चालती-फिरती पानटपरी” असे संबोधले जात आहे.
राज्यात अन्न व औषध प्रशासनाकडून गुटखाविरोधात कारवाई सुरू असताना किनवट, गोकुंदा, घोटी व बोधडी परिसरात अशा प्रकारे नियमांना चुकवून विक्री होत असल्याचा दावा काही नागरिकांनी केला आहे. दरम्यान, उपविभागीय पोलीस अधिकारी चंद्रकांत कदम यांच्या कार्यकाळात अवैध गुटखा, जुगार, मटका आणि अवैध प्रवासी वाहतुकीवर कारवाई झाल्याने मोठ्या प्रमाणात आळा बसल्याचेही नागरिक सांगतात.
तथापि, काही विक्रेते नवीन पद्धतीचा अवलंब करून गुटखा विक्री सुरू ठेवत असल्याची चर्चा असून, काही ठिकाणी दहा रुपयांचा गुटखा अधिक दराने विकला जात असल्याचाही दावा केला जात आहे.
स्थानिक नागरिकांनी अशा प्रकारांवर अन्न व औषध प्रशासन आणि पोलिसांनी संयुक्तपणे कारवाई करून अवैध विक्रीला आळा घालण्याची मागणी केली आहे.
