शहादा | प्रतिनिधी
दिल्लीतील जंतरमंतर येथे आंदोलन करणारे संशोधक व रॅमन मॅगसेसे पुरस्कार विजेते सोनम वांगचूक यांच्या समर्थनार्थ शहादा येथे 20 जुलै रोजी एकदिवसीय लाक्षणिक उपोषण आयोजित करण्याचा निर्णय विविध सामाजिक संघटना व संस्थांच्या बैठकीत घेण्यात आला आहे.
संभाजी नगर येथील प्रशिक बुद्ध विहार मैदानावर झालेल्या नियोजन बैठकीत हा निर्णय घेण्यात आला. आयोजकांच्या निवेदनानुसार, शिक्षण व्यवस्थेशी संबंधित विविध प्रश्न, तसेच केंद्र सरकारने आंदोलनाची दखल घ्यावी, या मागण्यांसाठी हे आंदोलन करण्यात येणार आहे.
हे लाक्षणिक उपोषण 20 जुलै रोजी सकाळी 10 ते सायंकाळी 4 वाजेपर्यंत शहादा येथील उपविभागीय अधिकारी कार्यालयासमोरील डॉ. बाबासाहेब आंबेडकर यांच्या पूर्णाकृती पुतळ्याजवळ होणार आहे. या आंदोलनात युवक, विद्यार्थी, सामाजिक कार्यकर्ते आणि विविध संघटनांच्या प्रतिनिधींनी सहभागी व्हावे, असे आवाहन आयोजकांनी केले आहे.
बैठकीला अखिल भारतीय पावरा-बारेला समाज संघटनेचे नामदेव पटले, जगदीश पवार, विधिज्ञ पेंढारकर आप्पा, आदिवासी एकता परिषदेचे हरीष बोरसे, योगेश मोगरे, माजी पंचायत समिती सभापती वनिता पटले, संविधान फेलो अश्विनी गोसावी, सामाजिक कार्यकर्ते छोटू कुवर, तापी काठ संघर्ष समितीचे अजय ठाकरे शेल्टीकर, अरुण जगदेव, अंनिसचे विनायक सावळे, संतोष माळी, रविंद्र पाटील, रविदास मैत्री संघाचे शिवाजी महाले, चेतन गांगुर्डे, प्रशिक बुद्ध विहाराचे संयोजक रघुनाथ बळसाणे, इंजिनिअर रविंद्र आगळे, फुले-आंबेडकर स्टडी सर्कलचे नरेंद्र महिरे, लोकशाही जागर समितीच्या रंजना कान्हेरे, चुनिलाल ब्राम्हणे, शिवाजी घोडराज, गणेश वळवी, दादाभाई पिंपळे यांच्यासह विविध सामाजिक संघटनांचे प्रतिनिधी उपस्थित होते.
