ब्रम्हपुरी | प्रतिनिधी | दि. १६ जुलै २०२६
पर्यावरण संवर्धनाचा संदेश देत आणि वाढत्या प्रदूषणावर मात करण्याच्या उद्देशाने ब्रम्हपुरी पोलीस वसाहतीमध्ये वृक्षारोपण कार्यक्रम उत्साहात पार पडला. चंद्रपूरचे पोलीस अधीक्षक आयुष नोपानी यांच्या संकल्पनेतून व ब्रम्हपुरीचे पोलीस निरीक्षक प्रमोद बानबले यांच्या मार्गदर्शनाखाली हा हरित उपक्रम राबविण्यात आला.
कार्यक्रमाचे वैशिष्ट्य म्हणजे “एक झाड – एक जबाबदारी” ही संकल्पना. प्रत्येकाने लावलेल्या रोपाचे संगोपन व संवर्धन करण्याची जबाबदारी स्वीकारत झाडे केवळ लावण्यापेक्षा ती जगविण्याचा निर्धार सहभागींकडून करण्यात आला.
यावेळी पोलीस कर्मचारी व स्थानिक नागरिकांनी उत्स्फूर्त सहभाग नोंदवला. पोलीस कर्मचारी गोपीचंद कुमरे, पुरुषोत्तम भरडे, देविदास रणदिवे, धनपाल निहाटे, मोहसिन खान, रिना धुर्वे तसेच सैनिक भास्कर मेश्राम यांनी वृक्षारोपणात सहभाग घेतला. याशिवाय ॲड. आशिष गोंडाने आणि सुशांत बनकर यांनीही सामाजिक बांधिलकी जपत उपक्रमात योगदान दिले.
पोलीस दल २४ तास कर्तव्य बजावत असतानाही पर्यावरण संरक्षणाची जबाबदारी स्वीकारत अशा उपक्रमांद्वारे समाजापुढे आदर्श निर्माण करत असल्याचे यावेळी उपस्थितांनी नमूद केले. ब्रम्हपुरी पोलीस वसाहतीचा परिसर भविष्यात अधिक हिरवागार आणि पर्यावरणपूरक बनविण्याच्या दृष्टीने हा उपक्रम महत्त्वपूर्ण ठरणार असल्याचा विश्वास व्यक्त करण्यात आला.
स्थानिक नागरिकांनीही या हरित उपक्रमाचे स्वागत करत, “झाडे लावा, झाडे जगवा” हा संदेश प्रत्यक्ष कृतीतून समाजापर्यंत पोहोचविल्याबद्दल ब्रम्हपुरी पोलिसांचे कौतुक केले.
