ब्रम्हपुरी | प्रतिनिधी | दि. १३ जुलै २०२६
ब्रम्हपुरी विधानसभा क्षेत्राचे आमदार विजयभाऊ वडेट्टीवार यांच्या अध्यक्षतेखाली आयोजित तालुकास्तरीय आमसभेत विविध शासकीय विभागांच्या विकासकामांचा सर्वंकष आढावा घेण्यात आला. ग्रामपंचायत स्तरावरील प्रलंबित प्रश्न तातडीने निकाली काढून शासनाच्या योजनांची प्रभावी अंमलबजावणी करण्यावर बैठकीत विशेष भर देण्यात आला.
बैठकीच्या प्रारंभी राष्ट्रसंत तुकडोजी महाराज आणि संत गाडगेबाबा यांच्या प्रतिमेला पुष्पहार अर्पण करून दीपप्रज्वलन करण्यात आले. गट विकास अधिकारी तुषार दांडगे यांनी प्रास्ताविक करत मागील आमसभेतील निर्णयांच्या अनुपालनाचा अहवाल सादर केला. त्यानंतर तालुक्यात सुरू असलेल्या तसेच पूर्ण झालेल्या विकासकामांचा विभागनिहाय सविस्तर आढावा घेण्यात आला.
बैठकीत पाणीपुरवठा व स्वच्छता, सार्वजनिक बांधकाम, एकात्मिक बाल विकास सेवा योजना, सिंचन, पंचायत राज, कृषी, आरोग्य, शिक्षण, राष्ट्रीय ग्रामीण जीवोन्नती अभियान, पशुसंवर्धन, ग्रामीण गृहनिर्माण (घरकुल), महावितरण, वन विभाग आदी विविध विभागांच्या योजनांची प्रगती, प्रलंबित कामे आणि अंमलबजावणीचा आढावा घेण्यात आला.
सरपंच, प्रशासक, तंटामुक्त समितीचे अध्यक्ष, शाळा व्यवस्थापन समितीचे अध्यक्ष आणि ग्रामस्थ प्रतिनिधींनी गावपातळीवरील विविध समस्या व विकासकामांबाबतच्या मागण्या मांडल्या. यावर आमदार विजयभाऊ वडेट्टीवार यांनी संबंधित विभागांच्या अधिकाऱ्यांना तातडीने कार्यवाही करून प्रश्न सोडविण्याचे निर्देश दिले. विकासकामांची गुणवत्ता, वेळेत पूर्तता, विभागांमधील समन्वय आणि शासनाच्या योजनांचा लाभ पात्र लाभार्थ्यांपर्यंत प्रभावीपणे पोहोचविण्याबाबत त्यांनी अधिकाऱ्यांना सूचना केल्या.
यावेळी खेमराज तिडके, डॉ. राजेश कांबडे, प्रमोद चिमुरकर, डॉ. थानेश्वर कायरकर, निलकंठ माणापुरे यांच्यासह विविध पदाधिकारी उपस्थित होते. तसेच जिल्हा परिषद व विविध शासकीय विभागांचे वरिष्ठ अधिकारी, अतिरिक्त मुख्य कार्यकारी अधिकारी कल्पना क्षीरसागर, प्रकल्प संचालक मंजीरी टकले, मुख्य लेखा व वित्त अधिकारी अतुलकुमार गायकवाड, जिल्हा आरोग्य अधिकारी डॉ. अशोक कटारे, कार्यकारी अभियंते, शिक्षणाधिकारी, उपविभागीय अधिकारी, तहसीलदार, गट विकास अधिकारी, तालुका कृषी अधिकारी, वनपरिक्षेत्र अधिकारी तसेच विविध विभागांचे अधिकारी व कर्मचारी मोठ्या संख्येने उपस्थित होते.
बैठकीत लोकप्रतिनिधी, सरपंच, प्रशासक, ग्रामस्थ आणि विविध समितीच्या पदाधिकाऱ्यांनी विकासासंदर्भातील विधायक सूचना मांडल्या. या आमसभेमुळे विभागांमधील समन्वय वाढून प्रलंबित विकासकामांना गती मिळेल आणि शासनाच्या योजनांची अधिक प्रभावी अंमलबजावणी होईल, असा विश्वास उपस्थितांनी व्यक्त केला.
सभेचा समारोप सहाय्यक गट विकास अधिकारी रविंद्र घुबडे यांनी आभार प्रदर्शन करून केला.
