📰 सारथी महाराष्ट्राचा न्यूज | चामोर्शी | प्रतिनिधी
फिलिपाईन्समधून वैद्यकीय शिक्षण पूर्ण करून भारतात परतल्यानंतर फॉरेन मेडिकल ग्रॅज्युएट एक्झामिनेशन (FMGE) परीक्षेत पहिल्याच प्रयत्नात उल्लेखनीय यश संपादन करणारे डॉ. अमेय ओल्लालवार यांचा भाजपा आदिवासी मोर्चा प्रदेशाध्यक्ष तथा माजी आमदार डॉ. देवराव होळी यांच्या हस्ते सत्कार करण्यात आला.
डॉ. अमेय ओल्लालवार हे राष्ट्रीय स्वयंसेवक संघाचे चामोर्शी तालुका संघचालक किशोर ओल्लालवार यांचे सुपुत्र आहेत. फिलिपाईन्समधून वैद्यकीय शिक्षण पूर्ण केल्यानंतर भारतात परत येत त्यांनी अवघ्या साडेतीन महिन्यांच्या कालावधीत अत्यंत नियोजनबद्ध, सातत्यपूर्ण आणि जिद्दीने FMGE परीक्षेची तयारी केली.
या कठीण परीक्षेत पहिल्याच प्रयत्नात यश मिळवत त्यांनी आपल्या कुटुंबासह गडचिरोली जिल्ह्याचे नाव उज्ज्वल केले आहे. परदेशातून वैद्यकीय शिक्षण पूर्ण केलेल्या विद्यार्थ्यांसाठी FMGE ही भारतात वैद्यकीय व्यवसाय करण्यासाठी महत्त्वाची पात्रता परीक्षा मानली जाते.
FMGE परीक्षा उत्तीर्ण झाल्यानंतर आवश्यक प्रक्रिया पूर्ण करून भारतात वैद्यकीय नोंदणी व व्यवसाय करण्याचा मार्ग खुला होतो. यंदाच्या परीक्षेचा एकूण उत्तीर्णतेचा दर केवळ १२.३८ टक्के इतका असल्याने डॉ. अमेय यांचे यश विशेष उल्लेखनीय ठरले आहे.
यावेळी माजी आमदार डॉ. देवराव होळी यांनी डॉ. अमेय ओल्लालवार यांचे अभिनंदन करून त्यांच्या उज्ज्वल वैद्यकीय कारकिर्दीसाठी शुभेच्छा दिल्या. ग्रामीण व आदिवासी भागातील विद्यार्थ्यांनी कठोर परिश्रम, सातत्य आणि आत्मविश्वासाच्या जोरावर राष्ट्रीय स्तरावरील स्पर्धात्मक परीक्षांमध्ये यश संपादन करून समाजासाठी प्रेरणादायी आदर्श निर्माण करावा, असे आवाहन त्यांनी केले.
याप्रसंगी किशोर ओल्लालवार (तालुका संघचालक, चामोर्शी) तसेच दिलीप चलाख उपस्थित होते.
