📰 सारथी महाराष्ट्राचा न्यूज | नेवासा | प्रतिनिधी
त्रिमूर्ती पावन प्रतिष्ठान संचलित श्री दादासाहेब हरिभाऊ घाडगे पाटील माध्यमिक व उच्च माध्यमिक विद्यालय, मुकिंदपूर येथे लोकशाहीर अण्णाभाऊ साठे यांच्या स्मृतिदिनानिमित्त सार्वजनिक अभिवादन कार्यक्रम उत्साहात पार पडला. शोषित, वंचित समाजाला आपल्या लेखणी आणि शाहिरीच्या माध्यमातून न्यायाची दिशा दाखवणाऱ्या अण्णाभाऊ साठे यांच्या कार्याला यावेळी अभिवादन करण्यात आले.
कार्यक्रमात वक्त्यांनी अण्णाभाऊ साठे यांच्या जीवनकार्यावर प्रकाश टाकत, अल्प औपचारिक शिक्षण असूनही त्यांनी आपल्या प्रतिभा, वैचारिक उंची आणि साहित्यसंपदेच्या बळावर मराठी साहित्याला जागतिक स्तरावर वेगळी ओळख मिळवून दिली, असे सांगितले. त्यांच्या विचारांचा वारसा जपण्याचे आवाहनही यावेळी करण्यात आले.
कार्यक्रमाला प्रमुख पाहुणे म्हणून भाऊसाहेब गाढवे पाटील उपस्थित होते. तसेच विद्यालयाचे प्राचार्य सोपानराव काळे, विभाग प्रमुख ताके सर, तांबे सर, क्रीडा प्रमुख निकाळजे सर, धनुर्विद्या प्रशिक्षक दळवी सर, संगीत विभाग प्रमुख सोपान दारकुंडे, छबुराव काळे, गायके सर, महादेव काकडे यांच्यासह शिक्षकवृंद उपस्थित होते.
यावेळी पत्रकार समाधान सम्राट, विद्यार्थी, पालक आणि नागरिकांनी मोठ्या संख्येने सहभाग घेतला. कार्यक्रमाची सांगता लोकशाहीर अण्णाभाऊ साठे यांच्या प्रतिमेला पुष्पहार अर्पण करून आदरांजली वाहण्यात आली.
