📰 सारथी महाराष्ट्राचा न्यूज | भडगाव | प्रतिनिधी
भडगाव शहरातील वडधे, कराब, पेठ आणि यशवंतनगर परिसरातील विविध शासकीय जमिनींच्या प्रश्नांबाबत जळगाव जिल्हाधिकारी कार्यालयात महत्त्वपूर्ण बैठक पार पडली. शहराच्या भविष्यातील विकासाला गती देण्यासाठी विविध विकासात्मक विषयांवर सविस्तर चर्चा करण्यात आली.
बैठकीत जिल्हा परिषद व सार्वजनिक बांधकाम विभागाच्या ताब्यातील जागा नगरपरिषदेच्या नावे हस्तांतरित करण्याबाबत सकारात्मक विचारविनिमय झाला. तसेच भगोटाधारक ग्रामस्थांच्या जागांचा प्रश्न मार्गी लावण्यासाठी आवश्यक कार्यवाही करण्यावर भर देण्यात आला.
याशिवाय विकासकामांसाठी आवश्यक शासकीय जागा उपलब्ध करून देणे, प्रादेशिक परिवहन कार्यालय (RTO) स्थापन करण्यासाठी जागा निश्चित करणे, तसेच भडगाव शहरात थोर राष्ट्रपुरुष आणि महान विभूतींच्या स्मारकांसाठी योग्य जागा उपलब्ध करून देण्याबाबत चर्चा झाली.
शहराच्या मध्यभागातून वाहणाऱ्या सुकी नदीच्या पात्रातील जागा नगरपरिषदेच्या ताब्यात देऊन त्या ठिकाणाचा सार्वजनिक सुविधा व विकासकामांसाठी उपयोग करण्याच्या प्रस्तावावरही सकारात्मक चर्चा करण्यात आली.
भडगाव शहराच्या सर्वांगीण विकासासाठी आवश्यक शासकीय प्रक्रियांना गती देऊन विविध प्रलंबित प्रश्न मार्गी लावण्यासाठी संबंधित विभागांनी समन्वयाने कार्य करावे, असा बैठकीत सूर व्यक्त करण्यात आला. भविष्यातील विकास आराखड्याला गती देण्यासाठी अशा बैठका महत्त्वपूर्ण ठरणार असल्याचेही यावेळी नमूद करण्यात आले.
