📰 सारथी महाराष्ट्राचा न्यूज | एरंडोल | प्रतिनिधी
एरंडोल तालुक्यातील शेतकऱ्यांच्या सिंचन क्षमतेत वाढ करण्यासाठी महत्त्वाच्या ठरणाऱ्या पद्मालय (पद्मालय धरण)-२ उपसा सिंचन योजनेअंतर्गत १९८२ हेक्टर क्षेत्रासाठी बंदिस्त नलिका वितरण प्रणालीच्या कामासाठी मंजूर झालेल्या ६५ कोटी रुपयांच्या प्रकल्पाची आमदार ॲड. अमोल पाटील यांनी प्रत्यक्ष पाहणी केली. यावेळी त्यांनी संबंधित अधिकाऱ्यांना कामाची गुणवत्ता कायम राखत संपूर्ण प्रकल्प एका वर्षात पूर्ण करण्याच्या सूचना दिल्या.
या पाहणीदरम्यान तापी पाटबंधारे विकास महामंडळाचे अधीक्षक अभियंता गोकुळ महाजन, कार्यकारी अभियंता उत्तम दाभाडे, उपअभियंता आरती सूर्यवंशी यांच्यासह संबंधित अधिकारी, कंत्राटदार व स्थानिक पदाधिकारी उपस्थित होते.
यावेळी बंदिस्त नलिका वितरण प्रणाली, वितरण जाळे, रस्ता व नाला क्रॉसिंग, पाणी वापर संस्था इमारती तसेच इतर अनुषंगिक कामांचा आढावा घेण्यात आला. शेतकऱ्यांना लवकरात लवकर सिंचनाचा लाभ मिळावा यासाठी नियोजनबद्ध पद्धतीने काम पूर्ण करण्याचे निर्देश आमदार अमोल पाटील यांनी दिले.
या प्रकल्पामुळे १९८२ हेक्टर क्षेत्राला आधुनिक सिंचन सुविधा उपलब्ध होणार असून, पाण्याची नासाडी कमी होऊन पाणी थेट शेतापर्यंत पोहोचणार आहे. त्यामुळे बाष्पीभवन व गळती कमी होऊन सिंचन कार्यक्षमता वाढणार, कमी पाण्यात अधिक क्षेत्र सिंचनाखाली येणार आणि शेतकऱ्यांच्या उत्पादनात वाढ होण्यास मदत होणार आहे.
तसेच या योजनेमुळे सिंचनाचा खर्च, वेळ आणि श्रम कमी होऊन वर्षभर विविध पिके घेणे शक्य होणार असल्याने एरंडोल तालुक्यातील कृषी विकासाला नवी दिशा मिळेल, असा विश्वास यावेळी व्यक्त करण्यात आला.
