📰 सारथी महाराष्ट्राचा न्यूज | दुधनी | प्रतिनिधी
अक्कलकोट तालुक्यातील दुधनी भीमनगर येथील जिल्हा परिषद प्राथमिक कन्नड शाळेत शाळा व्यवस्थापन समितीची सभा उत्साहपूर्ण वातावरणात संपन्न झाली. सभेत शाळेच्या विकासासंदर्भातील विविध महत्त्वाच्या विषयांवर सविस्तर चर्चा करण्यात आली.
सभेच्या प्रारंभी प्रभारी केंद्रप्रमुख महेश गायकवाड यांनी प्रास्ताविक करून शाळेच्या कामकाजाची माहिती दिली. यावेळी शाळा व्यवस्थापन समितीचे अध्यक्ष बसवराज जन्न, उपाध्यक्ष उदय मगी, शिक्षण तज्ज्ञ तथा रिपाइं (आठवले) सोलापूर जिल्हा उपाध्यक्ष सैदप्पा शिवयोगी झळकी, मुख्याध्यापक प्रकाश नाईक यांच्यासह समितीचे सदस्य, पालक आणि ग्रामस्थ मोठ्या संख्येने उपस्थित होते.
सभेत शाळेचा शैक्षणिक दर्जा उंचावणे, पोषण आहाराची गुणवत्ता, विद्यार्थ्यांसाठी पिण्याच्या पाण्याची व्यवस्था, मुलींसाठी स्वच्छ शौचालय, शाळेतील गळती दुरुस्ती, शाळाबाह्य विद्यार्थ्यांचा शोध घेऊन त्यांना शिक्षणाच्या प्रवाहात आणणे आदी विषयांवर सखोल चर्चा करण्यात आली.
यावेळी अध्यक्ष बसवराज जन्न, उपाध्यक्ष उदय मगी आणि शिक्षण तज्ज्ञ सैदप्पा शिवयोगी झळकी यांनी शाळेच्या सर्वांगीण विकासासाठी पालक, शिक्षक आणि ग्रामस्थांनी एकत्रितपणे कार्य करण्याचे आवाहन केले. सभेचा समारोप शाळेच्या प्रगतीसाठी सर्वांनी सहकार्य करण्याचा निर्धार व्यक्त करत करण्यात आला.
