छत्रपती संभाजीनगर | प्रतिनिधी
संस्कार इनोव्हेटिव्ह अकॅडमीमध्ये शैक्षणिक वर्ष २०२६–२७ साठीच्या शालेय मंत्रिमंडळाचा पदग्रहण सोहळा उत्साहपूर्ण वातावरणात पार पडला. यापूर्वी लोकशाही पद्धतीने आणि शिस्तबद्ध वातावरणात घेण्यात आलेल्या शालेय मंत्रिमंडळ निवडणुकीत निवडून आलेल्या विद्यार्थ्यांनी आपल्या पदाची शपथ घेत जबाबदारी स्वीकारली.
विद्यार्थ्यांमध्ये नेतृत्वगुण, जबाबदारीची जाणीव, संघटनकौशल्य तसेच लोकशाही मूल्यांची रुजवणूक व्हावी, या उद्देशाने या निवडणुकीचे आयोजन करण्यात आले होते. विद्यार्थ्यांनी मतदान प्रक्रियेत उत्स्फूर्त सहभाग नोंदविला. त्यानंतर १८ जुलै रोजी अधिकृत निकाल जाहीर करण्यात आला.
पदग्रहण सोहळ्यात निवडून आलेल्या विद्यार्थ्यांनी शाळेची प्रामाणिकपणे, निष्ठेने आणि समर्पित भावनेने सेवा करण्याची शपथ घेतली.
यावेळी शाळेचे मुख्याध्यापक संतोष डांगे यांनी विद्यार्थ्यांना मार्गदर्शन करताना सांगितले की, शालेय मंत्रिमंडळ निवडणूक ही विद्यार्थ्यांमध्ये नेतृत्वकौशल्य, निर्णयक्षमता आणि लोकशाही मूल्यांची जाणीव निर्माण करणारा महत्त्वाचा उपक्रम आहे. अशा उपक्रमांमधून विद्यार्थी भविष्यात जबाबदार आणि कर्तव्यदक्ष नागरिक म्हणून घडतात, असे त्यांनी नमूद केले.
कार्यक्रमास संस्थेचे अध्यक्ष जगदीश देसले यांच्यासह लीना देसले, अरुण शेरे, सायली शेरे, अनिरुद्ध शेरे आणि केतकी देसले यांची प्रमुख उपस्थिती होती. मान्यवरांनी नव्याने निवडून आलेल्या विद्यार्थ्यांचे अभिनंदन करून त्यांच्या भावी कार्यासाठी शुभेच्छा दिल्या.
यावेळी शिक्षक, शिक्षकेत्तर कर्मचारी आणि विद्यार्थी मोठ्या संख्येने उपस्थित होते. संपूर्ण निवडणूक प्रक्रिया पारदर्शक, शांततापूर्ण आणि लोकशाही मूल्यांचे दर्शन घडविणारी ठरल्याचे उपस्थितांनी नमूद केले.
