धाड | प्रतिनिधी :
धाड पोलीस स्टेशन हद्दीतील नसीब नगर परिसरात सार्वजनिक वितरण प्रणाली (रेशन) मधील तांदळाची अवैध वाहतूक होत असल्याची गोपनीय माहिती मिळाल्यानंतर धाड पोलिसांनी धडक कारवाई करत 41 क्विंटल 63 किलो सरकारी रेशनचा तांदूळ आणि आयशर वाहन जप्त केले. या कारवाईत एकूण ₹3 लाख 41 हजार 600 रुपयांचा मुद्देमाल हस्तगत करण्यात आला.
प्रभारी अधिकारी सहाय्यक पोलीस निरीक्षक अजिनाथ मोरे यांच्या मार्गदर्शनाखाली हेड कॉन्स्टेबल रविंद्र चव्हाण, श्रीकृष्णा चव्हाण आणि पोलीस कॉन्स्टेबल भगवान खमाटे यांनी नसीब नगर येथे सापळा रचून आयशर कंपनीचे एमएच-04-बीजी-6022 क्रमांकाचे वाहन तपासले.
झडतीदरम्यान वाहनात 84 पोत्यांमध्ये 4,163 किलो (41 क्विंटल 63 किलो) सरकारी रेशनचा तांदूळ आढळून आला. जप्त तांदळाची अंदाजे किंमत ₹41,600, तर वाहनाची किंमत ₹3 लाख असल्याने एकूण ₹3,41,600 किमतीचा मुद्देमाल जप्त करण्यात आला.
प्राथमिक चौकशीत हे वाहन सलीम खान युसुफ खान (वय 42, रा. नसीब नगर, धाड) यांच्या मालकीचे असल्याचे समोर आले. तांदूळ सार्वजनिक वितरण प्रणालीतील असल्याचा संशय आल्याने पंचनामा करून तांदूळ व वाहन जप्त करण्यात आले आणि पुढील चौकशीसाठी धाड पोलीस ठाण्यात आणण्यात आले.
या प्रकरणी तहसीलदार, बुलढाणा यांच्या अहवालानंतर अत्यावश्यक वस्तू अधिनियम, 1955 मधील कलम 3 व 7 अन्वये धाड पोलीस ठाण्यात 14 जुलै 2026 रोजी गुन्हा दाखल करण्यात आला असून, पुढील तपास सुरू आहे.
