विजयवाडा | प्रतिनिधी
केएल (KL) युनिव्हर्सिटी, विजयवाडा येथून डॉ. सुखदीप म्हंकाळी चौगुले यांनी यांत्रिकी अभियांत्रिकी (Mechanical Engineering) शाखेत यशस्वीरित्या पीएच.डी. (Ph.D.) पदवी संपादन केली आहे. संशोधन प्रबंध यशस्वीरीत्या पूर्ण करून विद्यापीठाच्या सर्व शैक्षणिक प्रक्रिया पूर्ण केल्यानंतर त्यांना ही प्रतिष्ठित पदवी प्रदान करण्यात आली.
उद्योगाभिमुख संशोधनाला विशेष दाद
डॉ. चौगुले यांच्या संशोधनाचा केंद्रबिंदू औद्योगिक क्षेत्रात वापरल्या जाणाऱ्या पॅडल मिक्सर शाफ्टच्या संरचनात्मक कार्यक्षमतेचा अभ्यास हा होता. त्यांनी Stress, Deflection आणि Fatigue Failure या महत्त्वाच्या घटकांचे अत्याधुनिक संगणकीय विश्लेषण तंत्रांच्या साहाय्याने सखोल परीक्षण केले.
संशोधनाद्वारे विविध कार्यरत परिस्थितींमध्ये शाफ्टचे वर्तन अभ्यासून औद्योगिक समस्यांवर परिणामकारक अभियांत्रिकी उपाय सुचविण्यात आले आहेत. या निष्कर्षांमुळे उपकरणांची कार्यक्षमता, सुरक्षितता, विश्वसनीयता आणि आयुर्मान वाढण्यास मदत होणार असून देखभाल खर्च कमी करण्यासही हातभार लागणार आहे.
उद्योग क्षेत्रासाठी उपयुक्त निष्कर्ष
हे संशोधन पूर्णपणे उद्योगाभिमुख असून मिक्सिंग उद्योगातील उपकरणांच्या रचनेत सुधारणा, अनपेक्षित बिघाड कमी करणे आणि उत्पादन प्रक्रियेची गुणवत्ता वाढविण्यासाठी महत्त्वपूर्ण ठरणार असल्याचे मानले जात आहे. अभियांत्रिकी क्षेत्रातील हे संशोधन मोलाचे योगदान म्हणून पाहिले जात आहे.
अभिनंदनाचा वर्षाव
या उल्लेखनीय शैक्षणिक यशाबद्दल माजी केंद्रप्रमुख श्री. म्हंकाळी चौगुले यांचे चिरंजीव डॉ. सुखदीप म्हंकाळी चौगुले यांचे शैक्षणिक, सामाजिक आणि औद्योगिक क्षेत्रातून अभिनंदन होत आहे. त्यांच्या भावी संशोधन, अध्यापन आणि औद्योगिक क्षेत्रातील वाटचालीसाठी शुभेच्छांचा वर्षाव होत आहे.
