उरण | प्रतिनिधी :
देशभरात घडलेल्या नीट (NEET) आणि टेट (TET) परीक्षा पेपरफुटीच्या घटनांच्या निषेधार्थ डेमोक्रॅटिक यूथ फेडरेशन ऑफ इंडिया (DYFI) आणि स्टुडंट्स फेडरेशन ऑफ इंडिया (SFI), उरण यांच्या वतीने सोमवार, २० जुलै रोजी सकाळी ११ वाजता गांधी चौक, उरण येथे आंदोलन आयोजित करण्यात आले आहे.
संघटनांनी प्रसिद्ध केलेल्या पत्रकानुसार, वारंवार होत असलेल्या पेपरफुटीमुळे लाखो विद्यार्थ्यांचे शैक्षणिक, आर्थिक आणि मानसिक नुकसान होत असून, परीक्षा व्यवस्थेवरील विश्वास डळमळीत झाला आहे. प्रामाणिकपणे अभ्यास करणाऱ्या विद्यार्थ्यांच्या भवितव्याशी खेळ होत असल्याचा आरोप संघटनांनी केला आहे.
पत्रकात केंद्र व राज्य सरकारच्या परीक्षा व्यवस्थेवर टीका करत, पेपरफुटीच्या घटनांमध्ये दोषींवर कठोर कारवाई करण्यात अपयश आल्याचा आरोप करण्यात आला आहे. परीक्षा व्यवस्थेतील भ्रष्टाचार, निष्काळजीपणा आणि पारदर्शकतेचा अभाव दूर करण्यासाठी ठोस उपाययोजना करण्याची मागणीही करण्यात आली आहे.
आंदोलनाद्वारे शिक्षणमंत्र्यांचा राजीनामा, पेपरफुटी प्रकरणाची सर्वोच्च न्यायालयाच्या निवृत्त न्यायाधीशांमार्फत चौकशी, दोषींना कठोर शिक्षा, राष्ट्रीय परीक्षा संस्थेच्या (NTA) कार्यपद्धतीबाबत कारवाई, प्रभावित विद्यार्थ्यांना आर्थिक मदत, टेट परीक्षा पारदर्शक पद्धतीने पुन्हा घेणे तसेच परीक्षा केंद्रांपर्यंत विद्यार्थ्यांसाठी मोफत प्रवासाची सुविधा उपलब्ध करून देण्यासह विविध मागण्या मांडण्यात येणार आहेत.
DYFI आणि SFI यांनी उरण तालुक्यातील विद्यार्थी, पालक, युवक आणि नागरिकांना मोठ्या संख्येने आंदोलनात सहभागी होण्याचे आवाहन केले आहे. “पेपरफुटी थांबवा, विद्यार्थ्यांचे भविष्य वाचवा” हा आंदोलनाचा प्रमुख संदेश असल्याचे संघटनांनी म्हटले आहे.
दरम्यान, या आंदोलनाकडे विद्यार्थी, पालक आणि परिसरातील नागरिकांचे लक्ष लागले असून, आंदोलनानंतर प्रशासनाची भूमिका काय राहते याकडेही सर्वांचे लक्ष असणार आहे.
