माढा प्रतिनिधी
माढा तालुक्यातील जिल्हा परिषद प्राथमिक शाळा, सुर्ली (केंद्र-निमगाव टें) येथे “आपलं गाव, आपली शाळा” या उपक्रमांतर्गत शनिवारी (दि. १८ जुलै) विद्यार्थ्यांच्या सहभागातून पारंपरिक दिंडी सोहळ्याचे आयोजन करण्यात आले. या उपक्रमामुळे संपूर्ण गाव भक्तिमय वातावरणात न्हाऊन निघाले.
दिंडीदरम्यान विद्यार्थ्यांनी वारकरी व संतांची वेशभूषा परिधान करून वारकरी परंपरा आणि सांस्कृतिक वारशाचे जतन करण्याचा संदेश दिला. तसेच पर्यावरण संरक्षणाचा जागरही संदेश देणारी घोषवाक्ये फलकांद्वारे सादर करण्यात आली. “एक वारकरी, एक वृक्ष”, “स्वच्छ वारी, निर्मळ पंढरी”, “निसर्गाचे करूया रक्षण, हीच विठ्ठलाची खरी भक्ती” आणि “विठ्ठल नाम मुखी, झाडे लावता सुखी” अशा घोषणांनी परिसर दुमदुमून गेला.
गावातील विठ्ठलभक्त, ग्रामस्थ आणि भजनी मंडळाने उत्स्फूर्त सहभाग घेत दिंडीचे स्वागत केले. घरोघरी पूजन, अभंग गायन आणि ग्रंथदिंडीच्या माध्यमातून वाचन संस्कृतीचा प्रसार करण्यात आला. कार्यक्रमानंतर फुगडी आणि प्रसादाचा आनंदही ग्रामस्थांनी घेतला.
हा उपक्रम यशस्वी करण्यासाठी शाळा व्यवस्थापन समिती, गावातील युवक, मुख्याध्यापक अनिल पवार, शिक्षक रमाकांत कांबळे, अंजू नाईकनवरे, अंगणवाडी सेविका तसेच गावातील विठ्ठलभक्त यांनी विशेष परिश्रम घेतले.
या उपक्रमातून विद्यार्थ्यांमध्ये अध्यात्म, पर्यावरण संवर्धन, वाचन संस्कृती आणि सामाजिक एकात्मतेचे संस्कार रुजविण्याचा प्रेरणादायी संदेश देण्यात आला.
