चोपडा | प्रतिनिधी
राष्ट्रीय पात्रता व प्रवेश परीक्षा (NEET-2026) चा निकाल नुकताच जाहीर झाला असून, चोपडा तालुक्यातील निमगव्हाण येथील ऋषिराज धनराज बाविस्कर याने पहिल्याच प्रयत्नात 720 पैकी 206 गुण मिळवत उल्लेखनीय यश संपादन केले आहे. त्याच्या या यशामुळे परिसरातून त्याच्यावर अभिनंदनाचा वर्षाव होत आहे.
ऋषिराज हा धनराज आधार बाविस्कर यांचा सुपुत्र असून, त्याने प्राथमिक शिक्षण जिल्हा परिषद प्राथमिक शाळा, निमगव्हाण येथे पूर्ण केले. त्यानंतर इयत्ता ११ वी व १२ वीचे शिक्षण कला, शास्त्र व वाणिज्य महाविद्यालयात घेतले.
लहानपणापासून डॉक्टर होण्याचे स्वप्न उराशी बाळगलेल्या ऋषिराजने सातत्यपूर्ण अभ्यास, कठोर परिश्रम आणि जिद्दीच्या जोरावर NEET-2026 परीक्षेत हे यश मिळवले. पहिल्याच प्रयत्नात मिळालेल्या या यशामुळे त्याचे आई-वडील, शिक्षक, नातेवाईक आणि गावकऱ्यांमध्ये आनंदाचे वातावरण निर्माण झाले आहे.
ऋषिराजच्या या यशाबद्दल विविध सामाजिक, शैक्षणिक आणि राजकीय स्तरातून त्याचे अभिनंदन करण्यात येत असून, त्याच्या उज्ज्वल भविष्यासाठी शुभेच्छांचा वर्षाव होत आहे.
