मुंबई (कांदिवली पश्चिम) | प्रतिनिधी
राज्य परिवहन महामंडळाने १७ जुलै २०२६ पासून एसटीच्या प्रवासी भाड्यात वाढ केली असली, तरी राज्यभरातील एसटी स्थानकांवरील मूलभूत सुविधांचा प्रश्न अद्यापही कायम असल्याचे मत पत्रकार भारत कवितके यांनी व्यक्त केले आहे. भाडेवाढीबरोबरच प्रवाशांना दर्जेदार सुविधा देण्याची गरज असल्याचे त्यांनी म्हटले आहे.
भारत कवितके यांनी सांगितले की, अनेक एसटी स्थानकांवर शौचालयांची दुरवस्था, पिण्याच्या पाण्याची अपुरी व्यवस्था, शेड व पंख्यांची कमतरता, खराब डांबरीकरण, तसेच नियंत्रण कक्षातील कर्कश ध्वनीप्रणाली यामुळे प्रवाशांना मोठा त्रास सहन करावा लागत आहे. याशिवाय स्थानक परिसरात भिकारी, गर्दुल्ले, दारूच्या नशेत असणारे आणि बेवारस व्यक्तींचा वावर वाढल्याने प्रवाशांच्या सुरक्षिततेचाही प्रश्न निर्माण झाला आहे.
पंढरपूर येथील एसटी स्थानकाचे उदाहरण देताना त्यांनी सांगितले की, स्थानक परिसरात प्रवाशांपेक्षा भिकारी व बेवारस व्यक्तींची संख्या अधिक दिसून येते. त्यामुळे प्रवाशांना बसण्यासाठीही जागा मिळत नाही. तसेच नॅन्सी कॉलनी एसटी स्थानकावरील शौचालयांची अवस्था अत्यंत खराब असून दरवाजे तुटलेले, नळांना पाणी नसणे आणि परिसरात डांबरीकरणाचा अभाव असल्याने विशेषतः पावसाळ्यात प्रवाशांना मोठा त्रास सहन करावा लागतो.
शौचालय ठेकेदारांकडून महिला व पुरुष प्रवाशांकडून मनमानी पद्धतीने शुल्क आकारले जात असल्याचाही आरोप त्यांनी केला. याबाबत अनेकदा बातम्या प्रसिद्ध करून महामंडळाचे लक्ष वेधण्याचा प्रयत्न केला असला, तरी अपेक्षित सुधारणा झालेली नसल्याचे त्यांनी नमूद केले.
याशिवाय काही एसटी स्थानकांवरील उपाहारगृहे बंद असल्यामुळे लांब पल्ल्याच्या प्रवाशांची गैरसोय होत आहे. नातेपुते येथे रात्री थांबणाऱ्या गाड्यांमध्ये प्रवाशांना चहा आणि मिसळपाव व्यतिरिक्त इतर खाद्यपदार्थ उपलब्ध नसल्याची तक्रार आहे. तर पुणे–मुंबई द्रुतगती मार्गावरील मॉल परिसरात गाड्या थांबत असल्या, तरी तेथील खाद्यपदार्थांच्या जास्त दरामुळे प्रवासी खरेदी करण्यास टाळाटाळ करतात.
सोलापूर एसटी स्थानकात जागेअभावी बस लावताना व बाहेर काढताना चालक आणि वाहकांना मोठी कसरत करावी लागत असल्याचेही त्यांनी निदर्शनास आणून दिले.
“भाडेवाढ झाली, पण त्याच प्रमाणात प्रवाशांना दर्जेदार सुविधा मिळणार का? स्थानकांवरील मूलभूत समस्या कधी दूर होणार?” असा सवाल पत्रकार भारत कवितके यांनी महाराष्ट्र राज्य मार्ग परिवहन महामंडळाकडे उपस्थित केला आहे.
