टाकळी हाजी : येथील प्रसिद्ध मळगंगा आई मंदिर परिसरात गुरुवारी आणि शुक्रवारी सुट्टीच्या दिवशी पर्यटक व भाविकांनी मोठ्या प्रमाणात गर्दी केली. नैसर्गिक दगडी परिसर तसेच मळगंगा मंदिर परिसर पाहण्यासाठी राज्यभरातून भाविक व पर्यटक मोठ्या संख्येने येथे दाखल झाले.
पहाटेपासूनच मंदिर परिसर आणि दगडी नदीपात्रात पर्यटकांची लक्षणीय वर्दळ पाहायला मिळाली. ऐतिहासिक मंदिर परिसर, दगडी काळातील पाण्याचे कुंड आणि निसर्गरम्य वातावरणामुळे हे ठिकाण पर्यटकांच्या आकर्षणाचे केंद्र बनले आहे. कुटुंबीयांसह आलेले पर्यटक, तरुण मित्रपरिवार तसेच भाविकांनी येथे भेट देऊन निसर्गाचा आनंद लुटला.
पर्यटकांची वाढती गर्दी लक्षात घेता सुरक्षा व्यवस्था आणि गर्दी नियंत्रणासाठी स्थानिक प्रशासनाकडून अतिरिक्त बंदोबस्त तैनात करण्यात आला. पर्यटकांच्या वाढलेल्या संख्येमुळे स्थानिक व्यापारी आणि लहान व्यावसायिकांनी समाधान व्यक्त केले.
दरम्यान, गर्दीच्या ठिकाणी नागरिकांनी काळजीपूर्वक वावरावे, प्रशासनाच्या सुरक्षा सूचनांचे पालन करावे तसेच नदीपात्र व धोकादायक ठिकाणी जाताना विशेष खबरदारी घ्यावी, असे आवाहन प्रशासनाकडून करण्यात आले आहे.
