नवेधर कोलगावात कथित बेकायदेशीर काँक्रिटीकरणाचा ग्रामस्थांचा आरोप; पोलिस बंदोबस्तावरही सवाल
सारथी महाराष्ट्राचा न्यूज
रायगड जिल्हा प्रतिनिधी – अमोल काठे
अलिबाग : अलिबाग तालुक्यातील नवेधर कोलगाव येथे गुरचरण जमिनीतून नीर्जा बिर्ला यांच्या बंगल्याकडे जाणाऱ्या रस्त्याचे काँक्रिटीकरणाचे काम सुरू असल्याचा आरोप ग्रामस्थांनी केला आहे. मात्र, गुरचरण जमिनीत अशा प्रकारचे रस्त्याचे काम करण्याची परवानगी नेमकी कोणी दिली? कोणत्या कायदेशीर आधारावर दिली? आणि संबंधित परवानगीची कागदपत्रे प्रशासन ग्रामस्थांसमोर का ठेवत नाही? असे थेट सवाल आता उपस्थित होत आहेत.
गुरचरण जमीन ही सार्वजनिक स्वरूपाची जमीन असल्याचा दावा ग्रामस्थांकडून करण्यात येत असून, त्या जमिनीतून खासगी बंगल्याकडे जाणारा रस्ता तयार करण्यास परवानगी देताना संबंधित अधिकाऱ्यांनी कोणती प्रक्रिया पार पाडली, याची चौकशी करण्याची मागणी होत आहे.
सामान्य ग्रामस्थांच्या जमिनीवर किंवा गावातील सार्वजनिक जागेवर कोणतेही काम करताना नियम-कायदे दाखवले जातात; मग खासगी बंगल्याकडे जाणाऱ्या रस्त्याच्या या कामासाठी कोणते नियम लागू केले गेले? प्रशासनाने याचे स्पष्ट उत्तर द्यावे, अशी मागणी ग्रामस्थांनी केली आहे.
ग्रामस्थांनी कामाबाबत जाब विचारण्याचा प्रयत्न केला असता पोलिस संरक्षण मागविण्यात आल्याचा आरोप करण्यात येत आहे. त्यामुळे प्रश्न विचारणाऱ्या ग्रामस्थांना संरक्षण की दबाव? असा सवालही उपस्थित झाला आहे. ग्रामस्थांमध्ये या प्रकाराबाबत तीव्र नाराजी असून, कोणत्याही दबावाला न जुमानता कामाची कायदेशीरता तपासावी, अशी मागणी होत आहे.
दरम्यान, या प्रकरणाची माहिती घेण्यासाठी घटनास्थळी गेलेल्या पत्रकारांना फोटो व व्हिडिओ करण्यास पोलिसांनी नकार दिल्याचे सांगण्यात आले. त्यामुळे सार्वजनिक हिताच्या विषयाचे वृत्तांकन करणाऱ्या पत्रकारांना घटनास्थळी छायाचित्रण करण्यास अडथळा का आणण्यात आला? पोलिसांना असे निर्देश कोणी दिले? याचेही उत्तर प्रशासनाने द्यावे, अशी मागणी होत आहे.
प्रशासनासमोर ग्रामस्थांचे थेट सवाल
१. गुरचरण जमिनीत रस्ता करण्याची परवानगी कोणी दिली?
२. ही परवानगी कोणत्या कायद्यानुसार किंवा आदेशानुसार देण्यात आली?
३. संबंधित परवानगीची कागदपत्रे ग्रामस्थांना का दाखवली जात नाहीत?
४. सार्वजनिक/गुरचरण जमिनीवर खासगी बंगल्यासाठी काँक्रिटीकरण करण्यास नियम काय सांगतात?
५. कामाची परवानगी नसल्यास संबंधितांवर कारवाई कधी होणार?
६. ग्रामस्थांनी जाब विचारल्यानंतर पोलिस संरक्षण का मागवण्यात आले?
७. पत्रकारांना फोटो व व्हिडिओ करण्यास नकार देण्याचे कारण काय?
या संपूर्ण प्रकरणाची महसूल विभाग, ग्रामपंचायत आणि संबंधित प्रशासनाने संयुक्त चौकशी करून रस्त्याच्या कामाची परवानगी, जमीन अभिलेख आणि संबंधित कागदपत्रे तपासावीत. नियमबाह्य काम आढळल्यास तात्काळ काम थांबवून जबाबदार व्यक्तींवर कायदेशीर कारवाई करावी, अशी मागणी नवेधर कोलगावातील ग्रामस्थांकडून होत आहे.
“कायद्याचा हात सर्वांसाठी समान आहे की श्रीमंतांसाठी वेगळा?” — आता प्रशासनाच्या उत्तराकडे ग्रामस्थांचे लक्ष लागले आहे.
