नेर येथील ठेवीदारांकडून प्रशासनाला पूर्वसूचना; ठेवींची रक्कम परत करण्याची मागणी
नेर : सारथी महाराष्ट्राचा न्यूज
नेर येथील महिला अर्बन बँक शाखेत जमा केलेल्या ठेवींची रक्कम परत मिळत नसल्याने ठेवीदारांमध्ये नाराजीचे वातावरण निर्माण झाले आहे. आपल्या ठेवींची रक्कम परत मिळावी, या मागणीसाठी सुनंदा सुभाष मेश्राम यांच्यासह इतर ठेवीदारांनी १ सप्टेंबर २०२६ पासून नेर येथे शांततापूर्ण उपोषण करण्याचा निर्णय घेतला आहे.
या संदर्भात ठेवीदारांनी नेर पोलीस ठाण्याचे पोलीस उपनिरीक्षक तथा ठाणेदार यांना लेखी निवेदन देऊन उपोषणाची पूर्वसूचना दिली आहे. ठेवीदारांच्या म्हणण्यानुसार, कष्ट आणि मोलमजुरी करून जमा केलेली रक्कम त्यांनी महिला अर्बन बँक, नेर शाखेत सुरक्षिततेच्या उद्देशाने ठेवली होती. मात्र, संबंधित ठेवींची रक्कम परत मिळत नसल्याने ठेवीदारांना आर्थिक अडचणींचा सामना करावा लागत आहे.
ठेवींची रक्कम परत मिळावी यासाठी संबंधित प्रशासन तसेच बँक व्यवस्थापनाकडे वेळोवेळी मागणी करून निवेदने देण्यात आली असल्याचे ठेवीदारांनी सांगितले. मात्र, अद्याप अपेक्षित कार्यवाही न झाल्याने प्रशासनाचे लक्ष वेधण्यासाठी उपोषणाचा मार्ग स्वीकारत असल्याचे निवेदनात नमूद करण्यात आले आहे.
उपोषणाच्या ठिकाणी आवश्यक पोलीस बंदोबस्त उपलब्ध करून द्यावा तसेच ठेवीदारांच्या मागण्या संबंधित प्रशासन आणि बँक व्यवस्थापनापर्यंत पोहोचविण्यास सहकार्य करावे, अशी मागणीही निवेदनाद्वारे करण्यात आली आहे.
महिला अर्बन बँक, नेर शाखेत जमा असलेल्या ठेवींची रक्कम संबंधित ठेवीदारांना नियमानुसार परत मिळावी, ही ठेवीदारांची प्रमुख मागणी आहे.
