सभापती सुनिलदादा जाधव व एजाजभाई बागवान यांची तत्परता; नगरपरिषदेच्या पथकाची कार्यवाही
प्रतिनिधी :
शिरूर : शहरातील भाजी बाजार परिसरातील पिठाच्या गिरणीत मोकाट वळू शिरल्याची माहिती मिळताच शिरूर नगरपरिषदेने तातडीने दखल घेत वळूला सुरक्षितपणे पकडून पांजरपोळ येथे हलविले. नागरिकांची सुरक्षितता आणि सार्वजनिक ठिकाणी निर्माण होणारी संभाव्य अडचण लक्षात घेऊन करण्यात आलेल्या या कार्यवाहीचे नागरिकांकडून कौतुक होत आहे.
या प्रकाराची माहिती मिळताच शिरूर नगरपरिषदेच्या नगराध्यक्षा ऐश्वर्याताई अभिजीत पाचर्णे यांनी संबंधित विभागाला तातडीने सूचना देऊन मोकाट वळूला सुरक्षितपणे पकडण्याचे निर्देश दिले. त्यानंतर बांधकाम व सार्वजनिक समिती सभापती तथा नगरसेवक सुनिलदादा जाधव आणि स्वच्छता सभापती तथा नगरसेवक एजाजभाई बागवान यांनी पुढाकार घेत प्रभाग क्रमांक ३ मध्ये नगरपरिषदेच्या पथकासह प्रत्यक्ष उपस्थित राहून वळूला पकडण्याची कार्यवाही केली.
यावेळी स्वच्छता विभागाचे दत्तात्रय बर्गे, मयूर जाधव आणि किरण जाधव यांच्या पथकाने प्रयत्नपूर्वक वळूला सुरक्षितपणे पकडले. त्यानंतर त्याला पांजरपोळ येथे सुरक्षित ठिकाणी हलविण्यात आले.
नागरिकांच्या अडचणीची माहिती मिळताच नगरपरिषद प्रशासनाने तातडीने कार्यवाही केल्याने नागरिकांनी समाधान व्यक्त केले. विशेष म्हणजे मोकाट जनावराला कोणतीही इजा न होता सुरक्षित ठिकाणी हलविण्यात आल्याने नागरिकांकडून नगराध्यक्षा, दोन्ही सभापती तसेच स्वच्छता विभागाच्या कर्मचाऱ्यांचे कौतुक करण्यात आले.
नागरिकांच्या समस्या आणि अडचणींची तातडीने दखल घेऊन प्रत्यक्ष कार्यवाही करण्याची नगरपरिषदेची भूमिका या घटनेतून अधोरेखित झाली आहे. शहरातील नागरिकांच्या सुरक्षिततेला प्राधान्य देतानाच मोकाट जनावरांच्या सुरक्षेचीही काळजी घेण्यात आली.
ऐश्वर्याताई अभिजीत पाचर्णे, नगराध्यक्षा, शिरूर नगरपरिषद यांनी सांगितले की, नागरिकांच्या समस्यांची माहिती मिळताच संबंधित विभागाला सूचना देऊन आवश्यक कार्यवाही करण्याचे निर्देश देण्यात आले. नागरिकांच्या सुरक्षिततेला प्राधान्य देत मोकाट वळूला सुरक्षित ठिकाणी हलविण्यात आल्याचे त्यांनी सांगितले.
सुनिलदादा जाधव, बांधकाम व सार्वजनिक समिती सभापती तथा नगरसेवक यांनी सांगितले की, प्रभाग क्रमांक ३ मधील नागरिकांच्या अडचणीची माहिती मिळताच प्रत्यक्ष ठिकाणी उपस्थित राहून नगरपरिषदेच्या कर्मचाऱ्यांसोबत समन्वय साधत वळूला सुरक्षितपणे पकडण्याची कार्यवाही करण्यात आली.
एजाजभाई बागवान, स्वच्छता सभापती तथा नगरसेवक यांनी सांगितले की, स्वच्छता विभागाच्या पथकासोबत प्रत्यक्ष ठिकाणी उपस्थित राहून मोकाट वळूला सुरक्षितपणे पकडण्यात आले. नागरिकांना कोणताही त्रास होऊ नये, यासाठी तातडीने कार्यवाही करून वळूला पांजरपोळ येथे हलविण्यात आले.
