जिल्हा प्रतिनिधी : चंद्रपूर
चंद्रपूर जिल्ह्यातील सामाजिक, शैक्षणिक आणि कला क्षेत्रात अग्रेसर असलेल्या बोरगाव या गावाला कलेचे माहेरघर म्हणून ओळखले जाते. या गावातून अनेक कलावंत घडले असून, झाडीपट्टी रंगभूमीच्या माध्यमातून समाजप्रबोधन आणि सामाजिक संदेश देण्याचे कार्य सातत्याने केले जात आहे.
बोरगाव येथील निर्माता, गीतकार, गायक व कलावंत संदेश भसारकर यांच्या कलाकृतीतून साकारलेले ‘गुलाबास लाजवी’ हे झाडीपट्टी गीत रसिकांच्या भेटीला येत आहे. गावाकडील वातावरणाचे सुंदर चित्रण आणि ग्रामीण जीवनाची अनुभूती या गीतातून मांडण्यात आली आहे. सामाजिक आशय व मनोरंजनाचा समतोल साधणाऱ्या या गीताला रसिकांचा चांगला प्रतिसाद मिळेल, अशी अपेक्षा व्यक्त करण्यात आली आहे.
या गीताची निर्मिती, गीतलेखन, गायन तसेच कलावंताची भूमिका संदेश भसारकर यांनी साकारली आहे. त्यांच्या सोबत सहकलाकार साक्षी धंदरे यांनी भूमिका केली आहे. गीताला संगीत अक्षय मेश्राम यांनी दिले आहे.
‘गुलाबास लाजवी’ या गीताचे चित्रीकरण सोमनाथ आणि मूल येथील पार्क परिसरात करण्यात आले असून, विश्वास आणि प्रशांत (ड्रीम स्टुडिओ, भंगाराम तळोधी) यांच्या टीमने चित्रीकरणाची जबाबदारी सांभाळली आहे.
हे गीत ५ सप्टेंबर रोजी सकाळी ९ वाजता ‘SANDESH BHASARKAR OFFICIAL’ या YouTube चॅनलवर प्रसारित करण्यात येणार आहे. रसिक प्रेक्षकांनी गीताचा आनंद घ्यावा आणि कलाकारांना प्रोत्साहन देण्यासाठी आपला प्रतिसाद व आशीर्वाद द्यावा, असे आवाहन संदेश भसारकर यांनी केले आहे.
झाडीपट्टी कलेसोबतच सामाजिक क्षेत्रातही समाजप्रबोधनाचे कार्य करणाऱ्या या कलावंतांच्या पुढील वाटचालीसाठी रसिकांनी असाच उत्स्फूर्त प्रतिसाद द्यावा, अशी अपेक्षा व्यक्त होत आहे.
