प्रतिनिधी:दरिकांत कोळेकर.
कुरुंदवाड :-येथील कुरुंदवाड शहर व परिसरात अवैधरित्या सुगंधी तंबाखू, सुपारी व इतर पदार्थांचे मिश्रण करून मावा विक्री करणाऱ्यांविरोधात कुरुंदवाड पोलिसांनी धडक कारवाई केली. ३ व ४ सप्टेंबर रोजी केलेल्या कारवाईत चार जणांवर गुन्हे दाखल करून एकूण १२२ माव्याच्या पुड्या व २ हजार ४४० रुपयांचा मुद्देमाल जप्त करण्यात आला.
पहिली कारवाई ३ सप्टेंबर रोजी सायंकाळी सातच्या सुमारास शिवराय मेन्स वेअरसमोर असलेल्या गणेश पान शॉप येथे करण्यात आली. या कारवाईत ओंकार अशोक कोळी (वय २६, रा. नांदणी नाका, संभाजीपूर, ता. शिरोळ) याच्याकडून ३२ माव्याच्या पुड्या, किंमत ६४० रुपये, जप्त करण्यात आल्या. याप्रकरणी पोलीस कॉन्स्टेबल सागर विलास खाडे यांनी फिर्याद दिली.
त्यानंतर सायंकाळी ७.१५ वाजता सिद्धार्थ चौकातील प्लेयरर्स पान शॉप येथे कारवाई करून म्हैफुज झाकीर तेरदाळे (वय २१, रा. अवचितनगर, अब्दुललाट) याच्याकडून २२ माव्याच्या पुड्या, किंमत ४४० रुपये, जप्त करण्यात आल्या. याप्रकरणी पोलीस कॉन्स्टेबल किशोर परशराम माळी यांनी फिर्याद दिली.
४ सप्टेंबर रोजी सकाळी ११ वाजता महाराणा प्रताप चौकातील स्टार पान शॉपवर कारवाई करून समीन बालेचाँद पैलवान (वय ४३, रा. शेळके गल्ली, शिरोळ) याच्याकडून ३२ माव्याच्या पुड्या, किंमत ६४० रुपये, जप्त करण्यात आल्या. तसेच दुपारी १२.१० वाजता कुरुंदवाड-नृसिंहवाडी मार्गावरील राधे पान भवन येथे कारवाई करून दत्तात्रय पुंडलिक सूर्यवंशी (वय ३३, रा. नदीवेस, दसरा चौक, शिरोळ) याच्याकडून ३६ माव्याच्या पुड्या, किंमत ७२० रुपये, जप्त करण्यात आल्या.
या चारही प्रकरणांत गुन्हे दाखल करण्यात आले आहेत. माव्याच्या पुड्यांवर कोणतेही लेबल किंवा तंबाखू सेवनासंदर्भातील वैधानिक इशारा नसल्याचे पोलिसांनी नमूद केले आहे.
या कारवायांमुळे कुरुंदवाड परिसरात अवैध मावा विक्री करणाऱ्यांमध्ये खळबळ उडाली आहे. पुढील तपास सपोनी शितल कुमार डोईझड यांच्या मार्गदर्शनाखाली कुरुंदवाड पोलीस करीत आहेत.
