पातूर ग्रामीण (प्रतिनिधी) |
पातूर तालुक्यातील पहाडसिंगी या छोट्याशा गावात दरवर्षीप्रमाणे याही वर्षी धम्म जागृतीचा आगळा उपक्रम सुरू झाला आहे. गौतमी महिला मंडळ व पंचशील मित्र मंडळ यांच्या संयुक्त पुढाकाराने धम्मशील बुद्ध विहारात ‘बुद्ध आणि त्यांचा धम्म’ या पवित्र ग्रंथाचे वाचन-पठण मोठ्या श्रद्धेने सुरू करण्यात आले आहे.
दररोज सायंकाळी ठीक ८ वाजता सार्वजनिक पंचशील, त्रिशरण व वंदना ग्रहण करून या ग्रंथ वाचनाला सुरुवात होते. या उपक्रमाचे विशेष आकर्षण म्हणजे या ग्रंथाचे मुख्य वाचन इयत्ता ८ वी मध्ये शिकणारा १४ वर्षीय करण दीपक सरकटे हा विद्यार्थी करतो. त्याच्या सुस्पष्ट वाचनाने उपस्थितांची मने जिंकली आहेत. तर ग्रंथातील गहन विषयाचा सारांश सुभाष सरकटे हे सोप्या भाषेत समजावून सांगतात. राहुल गवई आणि सुनील सरकटे हे ग्रंथाचे पठण करतात.
गौतमी महिला मंडळ व पंचशील मित्र मंडळातील उपासक-उपासिका मोठ्या उत्साहाने, आनंदाने आणि श्रद्धेने दररोज या धम्म वाणीचा लाभ घेत आहेत. गावात धम्ममय वातावरण निर्माण झाले आहे.
मान्यवरांची सदिच्छा भेट
दरम्यान भारतीय बौद्ध महासभा अंतर्गत पदाधिकारी व सामाजिक कार्यकर्त्यांनी धम्मशील बुद्ध विहाराला सदिच्छा भेट दिली. यावेळी प्रमुख पाहुणे म्हणून सुपाजी अंभोरे सर (सुकळी), जगदेव अंभोरे, कैलास कांबळे, सुधाकर अंभोरे, बाळकृष्ण अंभोरे उपस्थित होते. त्यांच्या हस्ते तथागत गौतम बुद्ध व डॉ. बाबासाहेब आंबेडकर यांच्या प्रतिमांचे पूजन करून सामूहिक वंदना घेण्यात आली.
याप्रसंगी धम्म उपासक सुपाजी अंभोरे सर यांनी ‘धम्म कल्याण मित्र व धम्माप्रती श्रद्धा’ या विषयावर अत्यंत प्रभावी व महत्त्वपूर्ण व्याख्यान दिले. सामाजिक कार्यकर्ते जगदेव अंभोरे यांनी ‘दान पारमिता’ या विषयावर, तर कैलास कांबळे यांनी धम्माप्रती आपले मनोगत व्यक्त करून उपस्थितांना मार्गदर्शन केले.
गौतमी महिला मंडळ व पंचशील मित्र मंडळाच्या अथक परिश्रमामुळे पहाडसिंगी गावात धम्म चळवळ अखंडपणे सुरू असून, या उपक्रमाचे सर्व स्तरातून कौतुक होत आहे.
