ग्राहकाची अन्न व औषध प्रशासनाकडे धाव हॉटेलच्या स्वच्छतेबाबत संताप व्यक्त
सविस्तर वृत्त:
नागपूर : शहरातील प्रसिद्ध ‘व्हाडी ठाट’ प्युअर व्हेज फॅमिली रेस्टॉरंटमध्ये एका ग्राहकाला रोटीमध्ये रस्सीसारखा तुकडा आढळल्याचा धक्कादायक प्रकार समोर आला आहे. रोटी खात असताना तुकडा तोंडात आल्याने ग्राहकाने तात्काळ हॉटेल व्यवस्थापनाला जाब विचारला.
मिळालेल्या माहितीनुसार, संबंधित ग्राहकाने हॉटेलमध्ये रोटीची ऑर्डर दिली होती. रोटीचा एक तुकडा तोडून खात असताना त्यात दोरी (रस्सी) सारखा लांबट तुकडा दिसून आला. या प्रकारामुळे ग्राहकाच्या आरोग्याबाबत गंभीर प्रश्न निर्माण झाला आहे.
या घटनेनंतर ग्राहकाने अन्न व औषध प्रशासनासह संबंधित अधिकाऱ्यांना याबाबत माहिती दिली आहे. अधिकाऱ्यांनी नमुने तपासणीसाठी जमा करण्याची शक्यता वर्तवली जात आहे. या प्रकरणाची अधिकृत चौकशी होऊन दोषींवर कठोर कारवाई करण्याची मागणी ग्राहकांकडून होत आहे.
शहरातील नामांकित हॉटेलमध्ये अशा प्रकारची घटना घडल्याने नागरिकांमध्येही चिंता व्यक्त केली जात आहे. हॉटेल आणि रेस्टॉरंटमध्ये अन्नाच्या गुणवत्तेबाबत नियमांचे काटेकोर पालन होत आहे का, यावर आता प्रश्नचिन्ह निर्माण झाले आहे.
- सारथी महाराष्ट्राचा न्यूज, नरेश जी. कानोजे (खापरखेडा), सावनेर तालुका प्रतिनिधी
