तहसीलदार व पुरवठा अधिकाऱ्यांच्या आश्वासनानंतर उपोषण मागे; आठ दिवसांत कार्यवाही करण्याचे आश्वासन
माढा, जि. सोलापूर : माढा तालुक्यात जनावरांसाठी चारा छावण्या सुरू कराव्यात आणि नागरिकांना पिण्याचे पाणी उपलब्ध करून द्यावे, या मागणीसाठी महाराष्ट्र राज्य जनहित शेतकरी संघटनेचे माढा तालुका युवक अध्यक्ष बालाजी (मामा) बारबोले पाटील यांनी बेमुदत अन्नत्याग उपोषण सुरू केले होते.
या आंदोलनस्थळी संबंधित अधिकाऱ्यांनी भेट देऊन उपोषणकर्त्यांचे निवेदन स्वीकारले. पुरवठा अधिकारी पवार साहेब यांनी हे निवेदन वरिष्ठ कार्यालयाकडे पाठविण्यात आल्याची माहिती दिली. तसेच माढा तालुक्यात चारा उपलब्ध करून देण्यासंदर्भात आठ दिवसांत आवश्यक कार्यवाही केली जाईल, असे आश्वासन तहसीलदार आणि पुरवठा अधिकारी पवार यांनी दिल्याचे सांगण्यात आले.
शेतकऱ्यांच्या मागण्यांवर कार्यवाहीचे आश्वासन
तालुक्यातील जनावरांसाठी चारा उपलब्ध करून देणे आणि पिण्याच्या पाण्याचा प्रश्न सोडवणे या मागण्यांवर प्रशासनाने तातडीने लक्ष द्यावे, अशी भूमिका बालाजी (मामा) बारबोले पाटील यांनी मांडली. अधिकाऱ्यांकडून आश्वासन मिळाल्यानंतर त्यांनी आपले उपोषण मागे घेतले.
शेतकरी व कार्यकर्त्यांची उपस्थिती
या वेळी सामाजिक व शेतकरी संघटनेचे कार्यकर्ते दाजीसाहेब उपळाई, वैभव गोरे (उपळाई), दिनेश उबाळे (दारफळ) यांच्यासह अन्य शेतकरी आणि मान्यवर उपस्थित होते.
आता प्रशासनाने दिलेल्या आश्वासनानुसार आठ दिवसांत प्रत्यक्ष कार्यवाही करून जनावरांच्या चाऱ्याचा आणि पिण्याच्या पाण्याचा प्रश्न सोडवावा, अशी अपेक्षा शेतकरी वर्गातून व्यक्त होत आहे.
सारथी महाराष्ट्राचा न्यूज
