आदिती शेंडगे, श्रेया राडे, पूर्वा साळुंके आणि निधी भडवळकर यांचे यश
सावर्डे (प्रतिनिधी) : इयत्ता दहावीच्या विद्यार्थ्यांना परीक्षेत उज्ज्वल यश मिळवण्यासाठी प्रेरणा देणाऱ्या चतुरंग प्रतिष्ठानच्या निवासी अभ्यासवर्गासाठी सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथील चार विद्यार्थिनींची निवड झाली आहे. आदिती शेंडगे, श्रेया राडे, पूर्वा साळुंके आणि निधी भडवळकर यांनी प्रवेश परीक्षेत गुणवत्ता यादीत स्थान मिळवत हे यश संपादन केले.
दहावीच्या परीक्षेची प्रभावी तयारी, अभ्यासातील सातत्य, शिस्तबद्ध जीवनशैली आणि आत्मविश्वास वृद्धिंगत करण्याच्या उद्देशाने चतुरंग प्रतिष्ठानतर्फे निवासी अभ्यासवर्गाचे आयोजन केले जाते. या उपक्रमातून विद्यार्थ्यांना दिवाळीच्या सुट्टीत निवासी स्वरूपात अभ्यास करण्याची तसेच विविध शैक्षणिक अनुभव घेण्याची संधी मिळते. रत्नागिरी आणि सिंधुदुर्ग जिल्ह्यांतील विविध शाळांमधील विद्यार्थी या प्रवेश परीक्षेत सहभागी होतात.
यंदाचा निवासी अभ्यासवर्ग ४ ते १९ नोव्हेंबर २०२६ या कालावधीत न्यू इंग्लिश स्कूल, वहाळ येथे आयोजित करण्यात येणार आहे. या वर्गात सहभागी होण्यासाठी निवड झालेल्या विद्यार्थिनी उत्सुक आहेत.
विद्यार्थिनींना सहाय्यक शिक्षिका गौरी शितोळे यांचे मार्गदर्शन लाभले. त्यांच्या या यशाबद्दल विद्यालयाचे प्राचार्य राजेंद्र वारे, उपप्राचार्य विजय चव्हाण, पर्यवेक्षक महेश कुलकर्णी, शिक्षकवृंद, विद्यार्थी आणि पालकांनी अभिनंदन केले.
