ध्येय जर पक्के असेल आणि कष्टाची तयारी असेल तर परिस्थिती कितीही बिकट असली तरी यश नक्कीच पायाशी लोळण घेते.
या ओळी सौ लता दत्ता मुळे यांच्या आयुष्याला अगदी तंतोतंत लागू होतात शिक्षण अवघे दहावी पास पती गवंड्याच्या हाताखाली रोजंदारीवर काम करणारे अन घरातील जेमतेम परिस्थिती. पण या सगळ्या प्रतिकूल परिस्थिती समोर हार न मानता स्वतःच्या जिद्दीच्या बळावर पतीच्या प्रोत्साहाणे प्रेरित होऊन कुटुंबाचे भविष्य उजळविणाऱ्या लताताई आज अनेक महिलांसाठी मार्गदर्शक ठरल्या आहेत. संघर्षातून उभा राहिलेला स्वावलंबनाचा प्रवास दीपस्तंभ ठरत आहे. घरची परिस्थिती बेताची असल्याने कुटुंबाला हातभार लावणे गरजेचे होते. पतीच्या रोजंदारीवर कुटुंबाचा आर्थिक भार आणि मुलांचे शिक्षण आणि भविष्याची चिंता सतावत होती परिस्थितीशी खचून न जाता शिलाई मशीन हाताशी धरली अन संसाराची घडी एका एका एका धाग्याने विनू लागल्या. शिलाई कामात पारंगत झाल्यावर त्यांनी ही कला केवळ स्वतःपुरती सीमित न ठेवता परिसरातील इतर गरजू मुलींनाही शिलाईचे धडे देऊ लागल्या त्यामुळे स्वतःला तर आर्थिकआधार मिळालाच शिवाय इतर मुलींना स्वतःच्या पायावर उभे राहण्यास मदत झाली.
लताताई नेहमी काळाबरोबर बदलत राहिल्या लॉकडाऊन मध्ये सर्व काही बंद असताना यावेळी मध्ये त्यांनी युट्युब च्या माध्यमातून ब्युटी पार्लरचे कौशल्य प्राप्त केले.हे सौंदर्य सजावटीचे कौशल्य आत्मसात करून आपल्या व्यवसायाचा विस्तार केला जोडीला रेडीमेड कापड विक्री ही चालू केली. आता आर्थिक स्थैर्य थोडे लाभले होते म्हणून त्यांनी सामाजिक दृष्टिकोन समोर ठेवून बचत गट एलआयसी एजंट उमेद च्या माध्यमातून गोरगरिबांच्या संसाराला हातभार लावण्याचे ठरविले. उमेद च्या माध्यमातून पशु सखी म्हणून कार्य करताना शासनाची महत्त्वकांक्षी असले ली योजना सीएमईजीपी च्या माध्यमातून गावातील गरजू विधवा महिलांना शेळीपालनासाठी कर्ज मंजूर करण्यात मोलाची कामगिरी बजावली. आज लताताई जो संघर्ष करत आहेत त्यामागील सर्वात मोठे ध्येय म्हणजे आपल्या मुलांचे उज्वल भविष्य मुलांनी चांगल्या वातावरणात शिकावे मोठे व्हावे समाजात सन्मानाने जगावे. शिलाई मशीनच्या एका छोट्या सुई धाग्यापासून सुरू झालेला हा प्रवास आज पार्लर एलआयसी एजंट बचत गटाच्या माध्यमातून एका मोठ्या वटवृक्षात रूपांतरित झाला आहे. लताताईचा हा जीवन प्रवास केवळ त्यांच्या कुटुंबापुरता मर्यादित न राहता तर परिसरातील शेकडो महिलांसाठी कष्ट जिद्द आणि चिकाटी या शब्दांचा खरा अर्थ पटवून देणारा दीपस्तंभ ठरला आहे…
