विठ्ठल-रुक्मिणीच्या नामघोषाने परिसर भक्तिमय; महिला व भाविकांचा उत्स्फूर्त प्रतिसाद
आजरा प्रतिनिधी :
हरपवडे : येथील श्री रासाईदेवी मंदिरात नवरात्रोत्सवाच्या पावन पर्वानिमित्त महिला सांप्रदायिक भजन व हरिपाठ कार्यक्रमाचे आयोजन करण्यात आले होते. श्री रासूबाई देवस्थान समितीच्या वतीने आयोजित या कार्यक्रमात पंचक्रोशीत प्रसिद्ध असलेल्या गवसे येथील विठ्ठल-रुक्मिणी महिला सांप्रदायिक भजन मंडळाने सहभाग घेतला. या सोहळ्याला महिला, ग्रामस्थ आणि भाविकांचा उत्स्फूर्त प्रतिसाद लाभला.
टाळ-मृदंगाचा गजर, विठ्ठल नामाचा जयघोष आणि महिलांच्या सुश्राव्य भजनांनी संपूर्ण परिसर भक्तिरसात न्हाऊन निघाला. अत्यंत उत्साही आणि भक्तिमय वातावरणात भजन व हरिपाठाचा कार्यक्रम संपन्न झाला. नवरात्रोत्सवाच्या निमित्ताने आयोजित या धार्मिक कार्यक्रमामुळे परिसरात भक्तिमय वातावरण निर्माण झाले.
या कार्यक्रमासाठी विणेकरी म्हणून सोपान काका पाटील, हेब्बाळकर महाराज आणि रावजी पाटील यांनी सेवा दिली. सुरपेटी वादनाची जबाबदारी संभाजी नवार महाराज यांनी, तर मृदंगाचार्य म्हणून नामदेव माडभगत महाराज यांनी साथ दिली. महिला सांप्रदायिक भजन मंडळ आणि ज्ञानदेव तिपे यांचेही विशेष सहकार्य लाभले.
कार्यक्रमाला मंदिराचे पुजारी, देवस्थान समितीचे अध्यक्ष व सर्व सदस्य, गावातील ग्रामस्थ आणि महिला मोठ्या संख्येने उपस्थित होते. कार्यक्रमाच्या शेवटी रवींद्र मस्कर सर यांनी उपस्थितांचे आभार मानले.
