माजी नगरसेवक तथा पत्रकार इलियास बावाणी यांची तहसीलदारांमार्फत शासनाकडे निवेदनाद्वारे मागणी
श्रीक्षेत्र माहूर : केंद्र सरकारच्या पीएम सूर्यघर मोफत वीज योजनेच्या धर्तीवर घरगुती पवन ऊर्जा प्रकल्पांसाठीही अनुदान योजना सुरू करावी, अशी मागणी माहूरचे माजी नगरसेवक तथा पत्रकार इलियास बावाणी यांनी तहसीलदारांमार्फत शासनाकडे निवेदनाद्वारे केली आहे. घरांच्या छतावर तसेच शेतात लहान पवनचक्क्या उभारण्यासाठी अनुदान उपलब्ध झाल्यास नागरिकांना वीज खर्चात बचत करता येईल, असे त्यांनी निवेदनात नमूद केले आहे.
केंद्र सरकारच्या पीएम सूर्यघर मोफत वीज योजनेअंतर्गत घरांवर सौर ऊर्जा प्रकल्प उभारण्यासाठी पात्रतेनुसार अनुदान दिले जाते. या योजनेमुळे अनेक नागरिक आणि शेतकरी सौर ऊर्जेकडे वळत आहेत. त्याच धर्तीवर आता ५०० वॅट ते २ किलोवॅट किंवा त्यापेक्षा अधिक क्षमतेच्या लहान पवन ऊर्जा प्रकल्पांसाठीही अनुदान, कर्जसुविधा आणि नेट मीटरिंगची व्यवस्था सुरू करावी, अशी मागणी बावाणी यांनी केली आहे.
नांदेड जिल्ह्यातील माहूर शहर उंचावर वसलेले असून तालुक्यातील अनेक गावांचाही भौगोलिक परिसर उंच भागात आहे. उन्हाळ्यात सौर ऊर्जेची निर्मिती चांगली होत असली, तरी रात्रीच्या वेळी सौर प्रकल्पातून वीज निर्मिती होत नाही. पावसाळ्यातही सूर्यप्रकाश कमी मिळाल्याने वीजनिर्मितीवर परिणाम होऊ शकतो. अशा परिस्थितीत वाऱ्यापासून वीज निर्मिती करणारी यंत्रणा उपयुक्त ठरू शकते, असे बावाणी यांनी म्हटले आहे.
घराच्या छतावर किंवा शेतात एक ते तीन किलोवॅट क्षमतेचा छोटा पवन ऊर्जा प्रकल्प उभारण्यासाठी आर्थिक मदत मिळाल्यास घरगुती वीज ग्राहक आणि शेतकऱ्यांना स्वतःची वीज निर्माण करण्याची संधी मिळेल. सौर आणि पवन ऊर्जा यांची एकत्रित हायब्रीड यंत्रणा वापरल्यास हवामान व वेळेनुसार वीज निर्मितीचे पर्यायी स्रोत उपलब्ध होऊ शकतात. त्यामुळे पारंपरिक वीजपुरवठ्यावरील अवलंबित्व कमी करण्यास मदत होऊ शकते, असेही निवेदनात नमूद करण्यात आले आहे.
लहान पवन ऊर्जा प्रकल्पांसाठी केंद्र सरकारच्या नवीन व नवीकरणीय ऊर्जा मंत्रालयाने पीएम सूर्यघर योजनेप्रमाणे स्वतंत्र पोर्टल, थेट लाभ हस्तांतरणाद्वारे (डीबीटी) अनुदान आणि नेट मीटरिंगची सुविधा उपलब्ध करून द्यावी, अशी मागणी करण्यात आली आहे. यामुळे ग्रामीण भागातील नागरिकांना पर्यायी ऊर्जा निर्मितीस प्रोत्साहन मिळेल, असा विश्वास बावाणी यांनी व्यक्त केला आहे.
शासनाने या मागणीचा गांभीर्याने विचार करून घरगुती पवन ऊर्जा अनुदान योजना लवकरात लवकर जाहीर करावी, अशी मागणी माजी नगरसेवक तथा पत्रकार इलियास बावाणी यांनी मुख्यमंत्री देवेंद्र फडणवीस, पालकमंत्री अतुल सावे, ऊर्जा राज्यमंत्री मेघना साकोरे-बोर्डीकर आणि जिल्हाधिकारी राहुल कर्डिले यांच्याकडे निवेदनाद्वारे केली आहे.
