कोजागिरी पौर्णिमेनिमित्त वार्षिक सर्वसाधारण सभा उत्साहात; चेअरमनपदी ह.भ.प. राजेंद्र महाराज आरगडे, तर व्हाईस चेअरमनपदी नवनाथ महाराज कदम
कोजागिरी पौर्णिमेच्या पावन पर्वानिमित्त श्री संत शिरोमणी सावता महाराज भजनी मंडळाची वार्षिक सर्वसाधारण सभा मंडळाचे ज्येष्ठ मार्गदर्शक ह.भ.प. दगुराव वाणी यांच्या अध्यक्षतेखाली भक्तिमय वातावरणात संपन्न झाली. या सभेत मंडळाच्या आगामी वाटचालीसाठी नवीन कार्यकारी मंडळाची निवड करण्यात आली. सर्व पदाधिकाऱ्यांची एकमताने निवड झाल्याने उपस्थित सदस्यांनी आनंद व्यक्त केला.
नवीन कार्यकारी मंडळाची निवड
या निवड प्रक्रियेत कार्यकारी मंडळाच्या अध्यक्षपदी ह.भ.प. काशिनाथ दादा काळोखे, कार्याध्यक्षपदी ह.भ.प. सचिन आप्पा ताजणे आणि उपकार्याध्यक्षपदी ह.भ.प. नारायण जगताप यांची निवड करण्यात आली. तसेच भजनी मंडळाच्या चेअरमनपदी ह.भ.प. राजेंद्र महाराज आरगडे, व्हाईस चेअरमनपदी नवनाथ महाराज कदम, सचिवपदी अक्षय महाराज जेजुरकर आणि खजिनदारपदी बाळासाहेब महाराज वाघ यांची एकमताने निवड करण्यात आली.
धार्मिक व सांस्कृतिक परंपरा जपण्याचे आवाहन
सभेदरम्यान मंडळाचे मार्गदर्शक ज्ञानेश्वर माऊली सोनवणे यांनी मंडळाच्या आजपर्यंतच्या कार्याचा आढावा सादर केला. धार्मिक, आध्यात्मिक आणि सांस्कृतिक क्षेत्रात मंडळाने केलेल्या कार्याची माहिती देत भविष्यातही भजन, कीर्तन आणि धार्मिक परंपरांचे जतन करण्यासाठी सर्व सदस्यांनी एकजुटीने कार्य करावे, असे आवाहन त्यांनी केले.
कोजागिरी पौर्णिमेपासून त्रिपुरारी पौर्णिमेपर्यंत आयोजित करण्यात येणाऱ्या काकडा भजनासाठी सर्व भाविक आणि सदस्यांनी नियमित उपस्थित राहावे, अशी विनंतीही त्यांनी केली.
मान्यवरांनी व्यक्त केले मनोगत
या वेळी शिवाजीराव दवंगे, बाबासाहेब दादा वाणी, नवनाथ कदम आणि राजेंद्र बारे यांच्यासह अनेक मान्यवरांनी आपले मनोगत व्यक्त केले. भजनी मंडळाची भावी वाटचाल अधिक सक्षम करण्यासाठी धार्मिक उपक्रमांमध्ये सातत्य राखणे, नव्या पिढीला अध्यात्माची गोडी लावणे आणि सर्व सदस्यांनी एकत्रितपणे मंडळाच्या कार्याला हातभार लावणे आवश्यक असल्याचे मत यावेळी व्यक्त करण्यात आले.
सभेला मंडळाचे ज्येष्ठ मार्गदर्शक नामदेवराव माळी, पंडितराव हराळे, कचरू वाणी, भाऊसाहेब नाजगड, हरिभाऊ दरेकर, राजेंद्र बारे, रावसाहेब जगताप, संदीप जगताप, सुंदरलाल माळी, मंदिराचे पुजारी सारंगधर सोनवणे, बाळासाहेब मांजरे, दत्तू वाघ, वाल्मिक जेजुरकर, पोपटराव जेजुरकर यांच्यासह भजनी मंडळाचे सदस्य मोठ्या संख्येने उपस्थित होते.
नवनियुक्त पदाधिकाऱ्यांचा सन्मान
निवडीनंतर नवनियुक्त पदाधिकाऱ्यांचा शाल, श्रीफळ, टोपी आणि हार घालून सत्कार करण्यात आला. उपस्थितांनी सर्व नवनियुक्त पदाधिकाऱ्यांचे अभिनंदन करून त्यांच्या पुढील कार्यकाळासाठी शुभेच्छा दिल्या. नवीन कार्यकारी मंडळाच्या माध्यमातून भजनी मंडळाचे धार्मिक आणि सामाजिक कार्य अधिक व्यापक होईल, असा विश्वास यावेळी व्यक्त करण्यात आला.
कार्यक्रमाचे सूत्रसंचालन रावसाहेब जगताप यांनी केले, तर बाबासाहेब दादा वाणी यांनी आभार मानले. सर्वांच्या सहकार्याने आणि भक्तिमय वातावरणात वार्षिक सर्वसाधारण सभा उत्साहात संपन्न झाली.
