पारंपरिक गाणी, बाहुल्यांचा संसार आणि ३२ प्रकारच्या खाऊच्या वाटपातून संस्कृती-परंपरेचे जतन
मालेगाव जहागीर, जि. वाशिम (प्रतिनिधी )
महाराष्ट्राच्या लोकसंस्कृतीतील पारंपरिक वारसा जपण्याच्या उद्देशाने मालेगाव जहागीर येथे कोजागिरी पौर्णिमेनिमित्त भुलाबाई अर्थात भाऊल्या मानण्याचा पारंपरिक उत्सव मोठ्या उत्साहात साजरा करण्यात आला. या उत्सवामुळे गावातील वातावरण आनंदमय झाले होते. लहान मुलींपासून तरुणींनीही या पारंपरिक सोहळ्यात उत्स्फूर्त सहभाग घेतला.
गावातील अनेक घरांमध्ये भुलाबाईच्या बाहुल्या मांडून त्यांचा संसार, पाट आणि पारंपरिक रुखवत आकर्षक पद्धतीने सजवण्यात आले होते. मुलींनी पारंपरिक वेशभूषा करून एकत्र येत भुलाबाईची गाणी आणि ओव्या म्हणत उत्सवाचा आनंद लुटला.
पारंपरिक गाण्यांनी परिसर दुमदुमला
“पहिले ग पूजा बाई देवा देवा सारे” आणि “अडकित जाऊ का खिडकीत जाऊ” यांसारख्या पारंपरिक गीतांनी परिसर दुमदुमून गेला. या गीतांमधून लोकपरंपरेचे दर्शन घडले. एकत्र जमून गाणी म्हणणे, भुलाबाईचा खेळ खेळणे आणि परंपरेनुसार विविध विधी पार पाडणे, यामुळे उत्सवाला विशेष रंगत आली.
३२ प्रकारच्या खाऊचे वाटप
उत्सवादरम्यान मुलींना हळदी-कुंकू लावून सन्मानित करण्यात आले. तसेच परंपरेनुसार ३२ प्रकारच्या खाऊचे वाटप करण्यात आले. या उपक्रमामुळे मुलींच्या चेहऱ्यावर आनंद फुलला, तर ग्रामस्थांनीही या सांस्कृतिक परंपरेचे कौतुक केले.
आधुनिक काळातही भुलाबाईसारख्या पारंपरिक उत्सवांतून लोकसंस्कृती, सामूहिक सहभाग आणि परंपरेचे महत्त्व पुढील पिढीपर्यंत पोहोचत आहे. मालेगाव जहागीर येथील या उत्सवाने गावातील सांस्कृतिक वारसा जपण्याचा सुंदर संदेश दिला.
